हिट फिल्मको स्वाद चाख्न नपाएकी ‘परस्त्री’की नायिका शिल्पा
काठमाडौं : अभिनेत्री शिल्पा मास्केमाथि लागेको ‘फ्लप’ अभिनेत्रीको दाग अझै जान सकेको छैन। अभिनयमा दम भएता पनि अहिलेसम्म उनका कुनै पनि फिल्मले सफलता हासिल गर्न सकेका छैनन्।
हलिउड फिल्म ‘डक्टर स्ट्रेन्ज’देखि नेपाली फिल्म ‘द ब्रेकअप’, ‘कागजपत्र’, ‘कठपुतली’, ‘फूलबारी’ हुँदै ‘परस्त्री’सम्म आइपुग्दा उनका सबै फिल्म असफल बने। उनले हालसम्म हिट फिल्मको स्वाद नै चाख्न पाएकी छैनन्।
बिहिबारदेखि प्रदर्शनमा आएको उनी अभिनीत पछिल्लो फिल्म ‘परस्त्री’बाट निकै अपेक्षा राखेकी शिल्पालाई यसमा पनि नराम्रो झड्का लाग्यो। फिल्म राम्रै भए पनि दर्शकबाट उनले सोचे जस्तो साथ पाइनन्।
‘परस्त्री’ काम गर्नका लागि पटक पटक सोचेकी उनी यस फिल्मबाट केही हुन्छ कि भनेर बोल्ड क्यारेक्टर निभाउन तयार भएकी थिइन्। तर शिल्पालाई दर्शकले खासै पत्याइदिएनन्।
नेपाल र भारतमा एकसाथ प्रदर्शन हुने फिल्मको चर्चाले उत्साहित भएकी शिल्पाले प्रचारप्रसारमा कुनै कसुर बाँकी राखिनन्। प्रचारप्रसारका लागि नेपालदेखि भारतसम्म दौडधूप गरे पनि फिल्मले भने कुनै कमाल गर्न सकेन।
असार २१, २०८० बिहीबार १२:१३:२२ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
