भारतको इलाहावाद अदालतले भन्योः 'आदिपुरुष'मा सीताको चरित्रको अपमान भयो, पुनः सेन्सर गर्नू

भारतको इलाहावाद उच्च अदालतले फिल्म ‘आदिपुरुष’का निर्देशक ओम राउत र संवाद लेखक मनोज मुन्तासिर शुक्लालाई व्यक्तिगत रूपमा अदालतमा उपस्थित भई आफ्नो धारणा राख्न आदेश दिएको छ।

न्यायाधीश राजेश सिंह चौहान र प्रकाश सिंहको इजलासले प्रभास, सैफ अली खान र कृति सेनन अभिनीत फिल्मलाई जारी गरिएको प्रमाणपत्रको पुनः जाँच गर्न केन्द्र सरकारलाई समिति गठन गर्न पनि निर्देशन दिएको छ।

अदालतले २८ जुनको आदेशमा फिल्मका संवाद लेखकलगायत फिल्मका निर्माताले पवित्रतालाई ख्याल नगरी फिल्ममा धार्मिक पात्रहरू प्रस्तुत गरेको पनि उल्लेख गरेको छ।

यस सम्बन्धमा अदालतले वाक तथा अभिव्यक्ति स्वतन्त्रताको नाममा कसैलाई पनि सदाचार, नैतिकता वा सार्वजनिक व्यवस्थाविरुद्ध काम गर्न दिन नहुने बताएको छ। 

अदालतले भनेको छ- 'यो फिल्म भारतीय संविधानको धारा १९ अन्तर्गत परीक्षणका लागि योग्य देखिएन। फिल्मका संवादहरू अभद्र भाषा मात्र होइन, देवी सीताको चरित्रको अपमान गरिएको छ। विभिषणकी श्रीमतीलाई चित्रण गर्ने केही दृश्यहरू पनि पहिलो नजरमा आपत्तिजनक छन्। रावण, उनको लंका आदिको चित्रण पनि हलुका भयो।'

अदालतले थप भनेको छ- ‘यस्तो फिल्म बनाउँदा फिल्म निर्माता र संवाद लेखकले पात्रहरू पुजनीय छन् भन्ने बुझ्नु जरुरी छ। लाजमर्दो र अभद्र ढंगले पात्र र संवादलाई प्रस्तुत गरेर जनताको भावना र भावनालाई धेरै हदसम्म यो फिल्मले बेवास्ता गरेको छ। 

असार १६, २०८० शनिबार २२:१७:५४ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।