हुँदै नभएको वडालाई अर्थमन्त्रीले कार्यक्रम नै तोकेर पठाए बजेट
![हुँदै नभएको वडालाई अर्थमन्त्रीले कार्यक्रम नै तोकेर पठाए बजेट](https://ukeraa.prixacdn.net/media/albums/Prakashsharan-Mahat_hinC8Wnm7b.jpg )
चितवनः माडी नगरपालिकामा नौ वडा मात्रै रहेका छन्।
२०७१ मङ्सिर १६ गते माडी उपत्यकाका चार वटा गाउँ विकास समितिलाई समाहित गरेर एउटा नगरपालिका बनाइएको हो।
गर्दी, बघौडा, कल्याणपुर र अध्योध्यापुरी गाउँविकास समितिलाई समाहित गरेर सो नगरपालिका बनाइएको थियो। सुरुवाती समयमा ११ वडा सिफारिस गरिएको भए पनि पछि सरकारले नौ वडा कायम गरेको थियो।
तर संघीय सरकारले आर्थिक वर्ष २०८०-८१ को बजेटमा वडा नं १० लाई बजेट विनियोजन गरेको छ। माडी नगरपालिका वडा नम्बर १० तोकेर अर्थ मन्त्रालयले सर्शत अनुदानको बजेट पठाएको नगर प्रमुख ताराकुमारी काजी महतोले बताइन्।
उनले भनिन्, 'माडीमा वडा नं १० छँदै छैन तर १० लाख बजेट वडा नं १० भनेर छुट्टयाइएको छ।' कार्यक्रम नै तोकेर बजेट विनियोजन गरिएको उनले बताइन्।
नगरपालिकालाई दिइएको बजेट भएको भए आवश्यकताअनुसार खर्च गर्न सकिने भए पनि तोकेर नै पठाइएपछि के गर्ने भन्ने अन्योलमा परेको उनको भनाइ छ।
स्यालोट्युवेल जडानका लागि रकम विनियोजन भएको नगरपालिकाका प्रमुख प्रशासकीय अधिकृत शेषकान्त पौडेलले जानकारी दिए।
नगरपालिकामा नयाँ जनप्रतिनिधि आएसँगै पहिलो कार्यपालिका बैठकले माडीको बाँदरझुलालाई वडा नं १० बनाउन संघीय सरकारलाई सिफारिस गरेको छ।
संघीय सरकारले निर्णय गरेको भने छैन। उनले भने, 'वडा सिफारिस गरिएको छ, तर निर्णय भइसकेको छैन, तर बजेट विनियोजन भएर आयो।'
अब यो बजेटलाई के गर्ने भन्ने विषयमा संघीय सरकारसँग कार्यान्वयनका क्रममा समन्वय गरिने उनले बताए। बजेट आएको भए पनि वडाको विषयमा आधिकारिक जानकारी नआएको उनको भनाइ छ।
माडीमा अन्तर सरकारी वित्तीय रकम ४७ करोड ५१ लाख रुपैयाँ बजेट आएको छ।
जेठ ३१, २०८० बुधबार १५:४४:३० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।