कालीकोटमा जीप दुर्घटना, तीन जनाको मृत्यु
काठमाडौं : कालीकोटमा गए राति जीप दुर्घटना हुँदा तीन जनाको मृत्यु भएको छ। कालीकोटको बेउली पान्तडी सडक खण्डको चौकी बजारबाट हाउडी जाँदै गरेको जीप गएराति दुर्घटना भएको हो।
जिल्ला प्रहरी कार्यालय कालीकोटका डीएसपी जयश्वर रिमालका अनुसार लु १ च ८४९८ नम्बरको जिप राति करिब ११:३० बजेतिर सडकबाट १५० मिटर तल खसेको थियो।
दुर्घटनामा मृत्यु हुनेमा जीप चालक शुभकालिका-२ का ३० वर्षीय हर्के विश्वकर्मा, दैलेख नौमुले-३ का २५ वर्षीय गोपाल सलामी मगर र शुभकालीका-८ का ३१ वर्षीय रामबहादुर शाही रहेको रिमालले जानकारी दिए।
दुर्घटनाको कारण खुल्न नसकेको र घटनाबारे अनुसन्धान भइरहेको उनले बताए। घटना मध्यराति भएका साथै जिपमा सवार तिनै जनाको मृत्यु भएको, देख्ने र घाइते अन्य नभएकाले पनि दुर्घटनाका कारण खुल्न नसकेको हो।
जेठ २८, २०८० आइतबार ०७:४६:३६ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।