‘रामकृष्ण श्रेष्ठ करको दर हेरफेर गर्न आएका होइनन्, डेटा इन्ट्री गर्न आएका हुन्’
काठमाडौं : अर्थमन्त्री डा. प्रकाशशरण महतले रामकृष्ण श्रेष्ठ करको दर हेरफेर गर्ने निर्णय प्रक्रियामा सहभागी नभएको स्पष्टीकरण पारेका छन्।
मंगलबार प्रतिनिधिसभाको बजेट निर्माणमा अनधिकृत व्यक्ति प्रवेश गरेको भनेर सांसदहरूले प्रश्न उठाएपछि त्यसको जवाफ दिने क्रममा मन्त्री महतले करको दर हेरफेर गर्ने प्रक्रियामा सहभागी नभएको बताएका हुन्।
अर्थमन्त्री महतले बजेट दिग्दर्शन अन्तर्गत भएका कानूनी व्यवस्थाअनुसार नै पदाधिकारी बसेर करका दरहरू तय गरिएको स्पष्ट पारे।
उनले भने, ‘२०७५ मा बनेको बजेट दिग्दर्शनअनुसार निर्णय प्रक्रियामा कुनै पनि अनधिकृत व्यक्ति संलग्न भएका छैनन्। नियमानुसारका व्यक्तिहरू मात्रै सहभागी भएका हौं।’
नियमानुसार सहभागी भएका पदाधिकारीहरुको निर्णय र सिफारिसका आधारमा रामकृष्ण श्रेष्ठलाई डेटा इन्ट्री गर्नका लागि बोलाइएको अर्थमन्त्री महतले स्पष्टीकरण दिए।
‘इन्ट्री गर्नका लागि ३० वर्षदेखि अनुभवी व्यक्ति भएकाले रामकृष्ण श्रेष्ठलाई समावेश गरिएको हो, रामकृष्ण श्रेष्ठले पदाधिकारीले जे–जे इन्टर गर भने त्यहि गरे,’ उनले भने, ‘मैले बिचौलियालाई छेउछाउमा पनि आउन दिएको छैन।’
यस्तै मन्त्री महतले आफू मन्त्रालयमा प्रवेश नै प्रभावमुक्त भएर काम गर्छु भनेर मन्त्रालय पसेको बताउँदै आजसम्म आफू त्यो प्रतिबद्धताबाट पछि नहटेको र भोलिका दिनमा पनि कर्तव्यनिष्ट भएर काम गर्ने विश्वास दिलाए।
सोमबार सञ्चारमाध्यममा १४ गते राति बजेट बनाउँदा अनधिकृत व्यक्ति संलग्न भएको दाबी गर्दै समाचार प्रकाशित भएको थियो। सोही विषयलाई लिएर संसद् बैठकमा प्रमुख विपक्षी दलका नेता लगायत अन्य सांसदहरुले प्रश्न उठाएका थिए।
जेठ २३, २०८० मंगलबार १५:०१:४७ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए ukeraanews@gmail.com मा पठाउनु होला।
