मछिन्द्र लिगको दोस्रो स्थानमा उक्लियो, ओलावालेले गरे ह्याट्रिक

काठमाडौं : ओलावालेले ह्याट्रिक गरेपछि सहिद स्मारक ए डिभिजन लिगमा मछिन्द्र फुटबल क्लब जित हात पार्दै दोस्रो स्थानमा उक्लिएको छ।

सातदोबाटोस्थित एन्फा कम्प्लेक्समा भएको खेलमा मछिन्द्रले सातदोबाटो युथ क्लबलाई ३–१ गोल अन्तरले पराजित गरेको हो। मछिन्द्रको जितमा विदेशी खेलाडी आफिज ओलावालेले ह्याट्रिक पूरा गरे।

खेलको १७ औं मिनेटमा ओलावालेले गोल गर्दै मछिन्द्रलाई सुरुआती अग्रता दिलाए। पहिलो हाफको अतिरिक्त समयमा ओलावालेले व्यक्तिगत दोस्रो गोल गर्दै मछिन्द्रलाई २–० को अग्रता दिलाएका थिए।

यसपछि खेलको ५६ औं मिनेटमा ओलावालेले ह्याट्रिक पूरा गर्दै मछिन्द्रलाई ३–० को अग्रता दिलाए। त्यसपछि खेलको ८४ औं मिनेटमा सातदोबाटोका जोर्डनले एक गोल गरेका थिए।

यस जितसँगै मछिन्द्र २३ खेलमा ३९ अङ्कसहित तालिकाको दोस्रो स्थानमा उक्लेको छ। समान खेल खेलेको सातदोबाटो २९ अङ्कसहित छैटौं स्थानमा रहेको छ।

लिग लिडर चर्च ब्वाइजको २३ खेलमा ४१ अङ्क छ।

जेठ १७, २०८० बुधबार १९:३६:५१ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।