फाइनल पुग्नबाट चुक्यो नेपाल, आइतबार तेस्रो स्थानका लागि खेल्ने

काठमाडौं : घरेलु टोली नेपाल काभा महिला भलिबल च्यालेन्ज कपको फाइनल पुग्न चुकेको छ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा शुक्रबार भएको सेमिफानइलमा काजकस्तानसमक्ष ३-२ को सेटमा पराजित भएसँगै नेपाल फाइनल पुग्नबाट चुकेको हो।

पहिलो सेट गुमाएको नेपालले त्यसपछिको दुई सेट जित्दै खेललाई आफ्नो पक्षमा पारेको थियो। तर, चौथो सेट पनि गुमाएपछि भने नेपाल दवावमा देखियो र खेल नै गुमाउन पुग्यो।

पहिलो सेट नेपालले २८–३० ले गुमाएको नेपाल दोस्रो सेटमा २५–१६ ले विजयी भयो। तेस्रो सेटमा २५–१५ को सहज जित निकालेको नेपालले चौथो सेटमा १८–२५ ले गुमायो।

पाँचौ सेटमा पनि नेपालको प्रदर्शन फितलो रह्यो। सुरुवादेखि नै पछि परेको नेपालले खेलमा फर्कने प्रयास गरेपनि काजकस्तानलाई ७–१५ ले नजिता सुम्पदै सेमिफाइनलबाटै बाहिरियो।

अब काजकस्तानले उपाधिका लागि आइतबार भारतको सामना गर्नेछ। भारतले शुक्रबारै उज्वेकिस्तानलाई ३–० को सोझो सेटमा हराएर फाइनलमा स्थान बनाएको थियो।

नेपालले भने तेस्रो स्थानको लागि उज्वेकिस्तानसँग खेल्नेछ। सो खेल पनि आइतबार नै हुनेछ।

जेठ १२, २०८० शुक्रबार १९:२२:३३ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।