रास्वपा सांसद विराजले बेवकुफ भनेपछि अर्थ मन्त्रीसँग विवाद

काठमाडौं : शनिबार बसेको प्रतिनिधि सभा अर्थ समितिको बैठकमा राष्ट्रिय स्वतन्त्र पार्टीका सांसद विराजभक्त श्रेष्ठले भनाइ राख्ने क्रममा केपी ओली नेतृत्वको सरकारले बजेटमा दिएको भ्युटावरको प्रसङ्ग जोडे।

उनले बैठकमा ‘एक पटक भ्यूटावरको कल्चर आएको थियो, डाँडाको टुप्पोमा भ्यूटावर भनेको कस्तो बेवकुफ हो’ भनेपछि बैठकमा सहभागी अर्थमन्त्री डा प्रकाशशरण महतसँग विवाद शुरू भयो।

श्रेष्ठले पुँजीगत खर्च भनेको पुँजीगत खर्च नभई पुँजीगत लगानी रहेको, त्यसले प्रतिफल दिनुपर्ने तर प्रतिफल कहिले र कति आउँछ भन्ने आँकलन नहुने प्रतिक्रिया दिए।

उनले गौतम बुद्ध र पोखरा अन्तर्राष्ट्रिय विमानस्थलको उदाहरण दिँदै योजना मनगढन्ते हुने बताउँदै भने- ‘एक पटक भ्यूटावरको कल्चर आएको थियो। डाँडाको टुप्पोमा भ्यूटावर भनेको कस्तो बेवकुफ हो। डाँडा आफैँ भ्यूटावर हो नि त!’

उनले व्यापार घाटामा कतै न कतै अवसर लुकेको भन्दै नेपालमा १३ करोडको त धनियाँ नै आयात हुने गरेको भन्द धनियाँमा आत्मनिर्भर बन्नुपर्ने सुझाव दिए।

महत भ्यूटावरको कुरामा केन्द्रित हुँदै टावरको कुरा संसददेखि सुनेको सुन्यै गरेको र त्यो ग्रहण गरिसकेँको प्रतिक्रिया दिए।

श्रेष्ठले निजी क्षेत्रले सरकारलाई विश्वास गर्न नसकेको भन्दै वित्तीय संस्थालाई नियमन गर्नेबारे अनि अर्थनीतिको तीन खम्बे नीतिबारे धारणा राखे।

महतले बुझेको बताए। श्रेष्ठ रोकिएनन्। उनले अर्थमन्त्रीलाई हतार नगर्न सुझाव दिए।

उनले बचतकर्ताको लाखौँ रुपैयाँ खाएर सहकारी भागिरहेको, खर्बौं रुपैयाँ वित्तीय प्रणालीमा नभएको भन्दै प्रश्न सोधे- ‘देशमा आर्थिक संकट नभए के लक्ष्मी भगवान आएर बस्छन्?’

सांसद् श्रेष्ठले मन्त्री महतले हतार गरेकोमा रिसाउँदै ‘तपाईंलाई हतार भयो भनेर हुन्छ? कि बैठक नै राख्नुभएन’ भनेपछि महतले व्याख्यामा नगई जिज्ञासा मात्र राख्न भने।

उनी रोकिएनन्। मन्त्रीले बुझेको भए किन आर्थिक संकट छ भन्दै प्रश्न गरे। महतले आजको आजै संकट समाधान नहुने भन्दै त्यसको लागि इमान्दार प्रयास गर्ने बताए।

श्रेष्ठले शनिबारको संसदीय समितिको बैठकको औचित्यबारे प्रश्न गरेपछि महतले समितिको सभापतिले बोलाएर आएको बताए।

जेठ ६, २०८० शनिबार २१:४५:१३ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए ukeraanews@gmail.com मा पठाउनु होला।