सरकारले सिँचाइका लागि विद्युत् महसुलमा छुट दिने

काठमाडौँः सरकारले कृषि क्षेत्रमा उत्पादकत्व वृद्धि गर्ने लक्ष्यका साथ सिँचाइलाई प्रमुख प्राथमिकतामा राखेर विद्युत् महसुलमा छुट दिने कार्यक्रम अगाडि सारेको छ।

राष्ट्रपति रामचन्द्र पौडेलबाट संघीय संसद्को संयुक्त बैठकमा आज प्रस्तुत सरकारको आगामी आर्थिक वर्षको नीति तथा कार्यक्रममा सिँचाइका निम्ति विद्युत् आपूर्तिको सहज व्यवस्था मिलाई विद्युत् महसुलमा छुट दिने नीति अगाडि सारिएको हो।

यस्तै, साना किसानलाई सिँचाइका लागि निःशुल्क वाटरपम्प तथा ट्युबवेल वितरण गर्ने, तराईमा तत्काल सिँचाइ नपुग्ने सुक्खा क्षेत्रमा ठूला पोखरी बनाई बर्सातको पानी जम्मा गरी सुक्खायाममा सिँचाइमा प्रयोग गर्न नमूना आयोजनाको सम्भावना अध्ययन गर्ने कार्यक्रम अगाडि सारिएको छ।

सिँचाइ तथा विद्युत् उत्पादनका लागि ट्रान्स भ्याली नदी प्रवाह आयोजनालाई निरन्तरता दिने सरकारको कार्यक्रममा समावेश छ।

त्यस्तै, भौगोलिक अवस्था र पानीको स्रोतको आधारमा उपयुक्त सिँचाइ प्रविधिमार्फत वर्षैभरि सिँचाइ सुविधा उपलब्ध गराइनेछ।

सिँचाइ गुरुयोजना अद्यावधिक गरी ठूला आयोजना कार्यान्वयन गर्दै लगिनेछ। ठूला तथा बहुउद्देश्यीय सिँचाइ आयोजनाको मूल एवं शाखा नहरको निर्माण तथा मर्मत कार्य द्रुत गतिमा अघि बढाउने सरकारको कार्यक्रममा समावेश छ। यस्तै, बहुउद्देश्यीय डाइभर्सन आयोजना निर्माण र सञ्चालनलाई तीव्रता दिने कार्यक्रम अगाडि सारेको सरकारले धादिङको सल्यानटारमा सिँचाइ सुविधा उपलब्ध गराउन आवश्यक प्रक्रिया अघि बढाउने भएको छ।

यसैगरी, अर्गानिक कृषि उत्पादनलाई प्रोत्साहन गर्न कृषि वस्तुको प्रमाणीकरण र ब्रान्डिङ गरी बजारीकरण गर्ने, चिया अलैँची र अदुवा जस्ता कृषिवस्तुको निर्यात प्रवर्द्धन गर्न विशेष कार्यक्रम सञ्चालन गर्ने सरकारको नीति तथा कार्यक्रममा समावेश छ। 

जेठ ५, २०८० शुक्रबार २०:१०:०९ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।