एक वर्षभित्र उदयपुरका ९ हजार बढी रोजगारीका लागि बिदेसिए
उदयपुरः जिल्लाबाट एक वर्षभित्रै ९ हजार युवा रोजगारीका लागि बिदेसिएका छन्।
जिल्ला प्रहरी कार्यालय र सुरक्षित आप्रवास योजना (सामी) उदयपुरको तथ्यांकअनुसार विसं २०७९ मा मात्रै वैदेशिक रोजगारीका लागि विदेश जाने युवाको संख्या ९ हजार हाराहारीमा पुगेको छ।
वैदेशिक रोजगारीमा जाने अधिकांश युवा सीप र काम गर्ने क्षमतासम्बन्धी अभिवृद्धि तालिम लिएर गएका सामी उदयपुरले जनाएको छ।
जिल्लाको आठ पालिकामध्ये त्रियुगा, चौदण्डी गढी र कटारी नगरपालिकाबाट सबैभन्दा धेरै युवा वैदेशिक रोजगारीका लागि बिदेसिएका छन्।
गाउँपालिकामध्ये लिम्चुङबुङ, रौतामाई र उदयपुर गढी गाउँपालिकाबाट धेरै युवा बिदेसिएका छन्।
सामी उदयपुरका संयोजक बिजनाकुमारी बस्नेतका अनुसार जिल्लाबाट मलेसिया जाने युवाको संख्या सबैभन्दा धेरै छ।
मलेसियापछि साउदी अरब, यूएई, कतार र कुवेतमा युवा जाने गरेका उनले बताए। जिल्ला प्रहरी कार्यालयका अनुसार २०७९ सालमा मात्रै जिल्लाबाट वैदेशिक रोजगारीमा जाने युवाको संख्या ८ हजार आठ सय ६८ छन्।
'विगतका वर्षमा सीप तथा तालिम नलिई युवा वैदेशिक रोजगारीमा जाने गरेकाले उनीहरूले विदेशमा धेरै समस्या झेल्नुपरेको थियो', सामीका संयोजक बस्नेतले भनिन्।
अहिले स्थानीय पालिकाको समन्वयमा वैदेशिक रोजगारीमा जान चाहनेलाई कामसम्बन्धी विभिन्न सीप र तालिम दिनुका साथै काम सिकेर जान प्रेरणा, सल्लाह, सुझाव दिन थालेपछि वैदेशिक रोजगारीमा जाँदा समस्या कम आउन थालेको उहाँले बताए।
यसअघि रोजगारीका लागि जाने युवाले सीपको अभावका कारण कम तलब पाउने, अपहेलित हुनुपर्ने र कम्पनी छाडेर भाग्नुपर्नेजस्ता समस्या झेल्ने गरेका बस्नेतको भनाइ थियो।
जेठ ३, २०८० बुधबार १५:३१:५३ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
