एमाले सबै प्रकारका भ्रष्टाचार छानबिन गर्न तयार छः महासचिव पोखरेल
एमाले महासचिव शंकर पोखरेलले नक्कली भुटानी शरणार्थी प्रकरण राष्ट्रमाथिको घात रहेको बताएका छन्।
राष्ट्रिय युवा सङ्घ नेपालको स्थापना दिवसका अवसरमा आज यहाँ आयोजित कार्यक्रममा उहाँले शरणार्थी प्रकरण ठगी मात्र नभएर राष्ट्रिय स्वाधीनता र स्वाभिमानको अपमान भएको बताए।
'नेपाल राष्ट्र आफैँ मानव तस्करीका लागि काम गर्दछ भन्ने जुन प्रकारको सन्देश गएको छ, त्यो राष्ट्रका लागि लज्जाको विषय भएको छ,' उनले भने।
बदमासी एउटाले गर्ने संकेत अर्कोतिर देखाउने काम भइरहेको भन्दै उनले अपराधमा जो-जो संलग्न छन्, तिनीहरूलाई कडाभन्दा कडा कारबाही गर्नुपर्ने धारणा राखे।
शरणार्थी प्रकरणसम्बन्धी घटनामाथि भइरहेको छानबिनलाई राजनीति नगर्नसमेत महासचिव पोखरेलले आग्रह गरे। उनले मुलुकलाई सुशासनतर्फ लैजान सबै प्रकारका भ्रष्टाचारको छानबिन हुनुपर्ने बताए।
महासचिव पोखरेलले एमाले सबै प्रकारका भ्रष्टाचारका घटना छानबिन गर्न तयार रहेको बताए। उनले मुलुकको विकास र समृद्धिको नेतृत्व गर्ने पार्टी नेकपा एमाले भएको बताए।
सुशासन, स्वतन्त्रता, स्वाभिमान र सामाजिक सुरक्षाको नेतृत्व गर्ने एमालेलाई कमजोर पार्न एमालेमाथि चौतर्फी आक्रमणको प्रयास भइरहेको उनको भनाइ थियो।
कार्यक्रममा एमाले पोलिटब्युरो सदस्य महेश बस्नेतले युवा संघ नयाँ युवाको बीचमा गई संगठन विस्तार गर्नुपर्ने बताए। उनले आगामी निर्वाचनमा एमालेलाई बहुमतमा ल्याउन अभियान चलाउनुपर्ने भन्दै युवामा रहेको ऊर्जालाई एमालेले मर्न नदिने बताए।
जेठ १, २०८० सोमबार २१:५६:४६ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
