म्यानचेस्टर सिटीलाई लिग उपाधि जित्न अब एक जित नै पर्याप्त

एजेन्सी : म्यानचेस्टर सिटीलाई इंग्लिस प्रिमियर लिग उपाधि जित्न अबका बाँकी तीन खेलमा एक जित नै पर्याप्त भएको छ।

गए राति भएको खेलमा सिटीले एभर्टनलाई ३-० ले हरायो। उता दोस्रो स्थानमा रहेको आर्सनल पराजित भएपछि सिटीको उपाधि सम्भावना निकै बलियो बनेको हो।

सिटीको जितमा गुन्डोगानले दुई गोल गरे। खेलको ३७ औं मिनेटमा गुन्डोगानले खाता खोल्दा दुई मिनेटपछि नै हालान्डले गुन्डोगानकै पासमा दोस्रो गोल गरेका थिए।

यसपछि ५१ औं मिनेटमा गुन्डोगानले व्यक्तिगत दोस्रो गोल गर्दै सिटीको जित पक्का गरे।

यो जितपछि दोस्रो स्थानमा रहेको आर्सनलभन्दा एक खेल कम खेलेको लिडर म्यानचेस्टर सिटीको अग्रता चार अंकको भएको छ।

अब लगातार तेस्रो पटक लिग उपाधि जित्न सिटिलाई तीन खेलमा एक जित नै पर्याप्त हुनेछ। सिटीको ३५ खेलबाट ८५ अंक छ भने आर्सनलको ३६ खेलबाट ८१ अंक छ।

जेठ १, २०८० सोमबार ०८:५६:४८ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।