चेल्सीलाई यो सिजन लिगमा टप टेनमा पर्न पनि गाह्रो, फेरि बराबरीमा रोकियो

एजेन्सी : यो सिजन खराब फर्ममा रहेको चेल्सी प्रिमियर लिगको खेलमा घरेलु मैदानमै नटिङहम फरेस्टसँग २–२ गोलको बराबरीमा रोकिएको छ।

लगातारको हार र बराबरीका कारण यो सिजना चेल्सीलाई लिगमा टप टेनमा पर्न पनि गाह्रो पर्ने देखिन्छ।

गए राति भएको खेलको १३ औं मिनेटमा नै पाहुना टोली नटिङहमको लागि ताइवोले खाता खोलेका थिए। पहिलो हाफमा १-० ले पछि परेपछि ५१ औं मिनेटमा रहिम स्टर्लिङले चेल्सीका लागि बराबरी गोल फर्काए।

५८ औं मिनेटमा स्टर्लिङले दोस्रो गोल गर्दा चेल्सीले खेलमा २–१ को अग्रता बनाएको थियो। तर यो अग्रता धेरै समय टिक्न सकेन।

चार मिनेट पछि नै नटिङहमका ताइवोले व्यक्तिगत दोस्रो गोल गर्दा खेल २-२ को बराबरीमा सकियो।

यो बराबरीसँगै चेल्सी ३५ खेलबाट ४३ अंकसहित लिगको ११ औं स्थानमा छ। १० औं स्थानमा रहेको ब्रेन्टफर्डको समान खेलबाट ५० अंक छ।

वैशाख ३१, २०८० आइतबार ०७:४३:१२ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।