चर्चामा ‘हल्कारा’को हस्तलिखित पत्र

काठमाडौं : फिल्म प्रोमोसन गर्ने काइदा सबैका आ–आफ्नै हुन्छन्। कतिपयले टिकटकमा प्रतिस्पर्धा राख्छन् त कसैले देशव्यापी कार्यक्रमको आयोजना गर्छन्।

आगामी शुक्रबारबाट प्रदर्शनमा आउन लागेको फिल्म हल्काराले भने अनौठो शैली अपनाएको देखियो। फिल्म हल्काराको निर्माण टिमले भने प्रिमियरमा अतिथि बोलाउने निमन्त्रणा पत्रले फिल्म क्षेत्रमा चर्चा पाएको छ।

सीमित अतिथीहरूलाई बोलाएर फिल्म प्रदर्शन हुनु एक वा दुई दिनअघि प्रिमियरमा फिल्म देखाउने चलन नेपाली फिल्म क्षेत्रमा कायमै छ।

हल्कारा टोलीले त्यहि प्रिमियरका लागि तयार पारेको निमन्त्रणा पत्र हातले लेखेर बाँडेपछि यसले फिल्म वृत्तमा चर्चा पाएको हो।
पत्रमा भनिएको छ,

प्रिय शुभचिन्तक ज्यू
हामी कुशल मंगल नै छौँ र तपाईंको पनि कुशल मंगल नै चाहन्छौँ। हामीले निकै मिहेनतका साथ निर्माण गरेको र यहि वैशाख २९ गतेबाट देशभर प्रर्दशनमा आउन लागेको चलचित्र ‘हल्कारा’को प्रिमियर शो आयोजना गरिएकोले निम्न मिति, स्थान र समयमा यहाँको उपस्थितिका लागि हार्दिक निमन्त्रणा दिन यो पत्र लेखेका छौँ।

मितिः .......
समयः .......
स्थानः .......
(तपाईंको प्रतिक्षा रहनेछ।)

उहि तपाईंको
बिक्रम सापकोटा निर्देशक
रामकृष्ण पोखरेल निर्माता
साथै हल्कारा चलचित्र परिवार

यहि व्यहोरा लेखिएको निमन्त्रणा पत्रले अहिले फिल्मी वृत्तमा चर्चित बनेको हो। निमन्त्रणा पाएकाहरूले भावुक हुँदै पत्र सामाजिक सञ्जालमा पोष्ट गरेका छन्।

विभिन्न अवार्ड समेत जितेको फिल्म हल्कारालाई मुभी लर्भस समूहले पेड प्रिमियर गरिसकेको छ। जसमा झण्डै २५० फिल्मप्रेमीले फिल्म हेरिसके।

फिल्म हेरिसकेका दर्शकले सिनेमेट्रोग्राफ्री र सरल संवादको प्रसंशा गरेका छन्।

वैशाख २६, २०८० मंगलबार १७:२८:१५ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।