झुटा विवरण पेश गरी नेपाली नागरिकता लिने १० भारतीय पक्राउ

झुटा विवरण पेश गरी १० भारतीयले नेपाली नागरिकता लिएको पाइएको छ ।

यसरी सक्कली नागरिकता प्राप्त गरेपछि भारतीयले घर जग्गा खरिद गरी व्यापार व्यवसाय गरिरहेको पाइएको काठमाडौँ उपत्यका अपराध अनुसन्धान कार्यालयले जनाएको छ । 

भारतको उत्तर प्रदेशका उनीहरूले तराईका जिल्लाहरू सिराहा, बारा, पर्सा, रुपन्देहीलगायतबाट नेपाली नागरिकता लिइएको भेटिएको हो। उनीहरूलाई पक्राउ गरी आज थप कारबाहीका लागि कार्यालयले जिल्ला प्रहरी परिसर टेकुका बुझाएको प्रहरी उपरीक्षक रवीन्द्र रेग्मीले बताए। 

उनीहरूलाई काठमाडौँको शंखमूल, कलंकी, बागबजार, गोंगबु, बानेश्वरलगायत स्थानबाट पक्राउ गरी आज सार्वजनिक गरिएको हो ।

उनीहरूमाथि आरोप पुष्टि भए नागरिकता ऐन तथा लिखतसम्बन्धी कसुरमा आवश्यक कारबाही गरिने छ।

पक्राउ पर्नेमा राहुल गुप्ता, भरतप्रसाद गुप्ता, ज्ञानमतीदेवी गुप्ता, गोपाल गुप्ता, रामसुन्दर गुप्ता, रामप्रवेश गुप्ता, भरत गुप्ता, स्नेहलता गुप्ता, मिनादेवी गुप्ता र राजेशकुमार गुप्ता रहेका छन् । 

भरतप्रसाद गुप्ताले सिरहाको रामनगर मिर्चैया–२ बस्ने शिव शंकरप्रसाद गुप्ताको छोराको नाममा २०६३ मै जन्मको आधारमा नेपाली नागरिकता लिएको देखिएको छ ।

राहुलले भरतप्रसाद गुप्ताको छोरा बनेर नागरिकता लिएको पाइएको छ । पक्राउ परेकी अर्का भारतीय नागरिक ज्ञानमतीदेवी गुप्ताले भरतप्रसाद गुप्ताको श्रीमती बनेर वैवाहिक अंगीकृत नेपाली नागरिकता लिएको पाइएको छ ।

पक्राउ परेका अर्का भारतीय नागरिक भरत गुप्ताले जिल्ला प्रशासन कार्यालय बाराबाट जन्मका आधारमा नागरिकता लिएको पाइएको छ । 

स्नेहलता गुप्ताले जिल्ला बारा निजगढ–८ बस्ने रामेश्वरप्रसाद गुप्ताको छोरी बनेर वंशजका आधारमा नागकिरता लिएको पाइएको छ ।

गोपाल गुप्ताले जिल्ला प्रशासन कार्यालय रुपन्देहीबाट नेपाली नागरिकता लिएको देखिएको, राजेशकुमार गुप्ताले जिल्ला बाराका दिनेशप्रसाद गुप्ताको छोरा बनेर जन्मको आधारमा नागरिकता लिएको भेटिएको छ।

मीनादेवी गुप्ताले जिल्ला बारा निजगढ–८ बस्ने रामानन्द साहको छोरी राजेशकुमार गुप्ताको श्रीमती बनेर वंशजका आधारमा, रामप्रवेश गुप्ताले मोहन गुप्ताको छोरा बनेर रुपन्देहीबाट, रामसुन्दर गुप्ताले मोहन गुप्ताको छोरा बनेर नागरिकता लिएका छन् । 

उनीहरूको सन् २०२१ देखि हालसम्म पनि भारतीय मतदाता नामावलीमा विवरण अद्यावधिक रहेको पाइएको छ ।

प्रहरीले उनीहरुबाट नेपाली नागरिकतासहित भारतीय राजदूतावासबाट भारतीय नागरिक भएको सिफारिस पत्र, भारतीय सवारी चालक अनुमतिपत्र, भारत सरकार आयकर विभागको कार्ड, भारतीय पासपोर्ट, भारतीय आधार कार्डलगायतका कागजात बरामद गरिएको प्रहरीले जनाएको छ ।

वैशाख २४, २०८० आइतबार १८:४९:०१ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।