वैदेशिक रोजगारीमा गएकाको तथ्यांक संकलन गर्दै भरतपुर महानगर

भरतपुर महानगरपालिकाले वैदेशिक रोजगारीमा गएका व्यक्तिको विवरण संकलन गर्ने भएको छ ।

कामको सिलसिलामा विभिन्न मुलुकमा गएका नागरिकको सही तथ्यांक लिन वैशाख १६ गतेदेखि विवरण संकलन गर्न लागिएको हो ।

महानगरका २९ वटै वडामा गएर गणकले वैदेशिक रोजगारीमा गएका घरपरिवारका सदस्यसँग यथार्थ विवरण संकलन गर्नेछन् ।

त्यसका लागि बिहीबारदेखि महानगरपालिकाले वैदेशिक रोजगारसम्बन्धी तथ्यांक संकलन, अभिलेखीकरण तथा पाश्र्वचित्र निर्माण गर्न गणकलाई दुई दिने अभिमुखीकरण कार्यशाला गोष्ठी आयोजना गरेको छ ।

स्वास्थ्य तथा सामाजिक विकास महाशाखाका निर्देशक शान्ताकुमारी पौडेलले प्रत्येक वडाबाट एक-एक गणकलाई प्रशिक्षण दिएर सम्बन्धित वडामा खटाइने बताए।

'यो महानगरको एउटा महत्वपूर्ण काम हो', उनले भने, 'महानगरले अब वैदेशिक रोजगारीमा गएका व्यक्तिको दस्तावेज निर्माण गर्ने छ ।'

गणकले आगामी असार १५ भित्रमा तथ्यांक संकलन गरेर महानगरपालिकामा बुझाइसक्नुपर्ने निर्देशक पौडेलको भनाइ थियो ।

वडामा जाने गणकहरूले वैदेशिक रोजगारीमा गएका व्यक्तिको घरघरमा गएर उनीहरूको पारिवारिक विवरणका साथै लिङ्ग, उमेर, वैदेशिक रोजगारीमा गएको अवधि, बुझेर गए नगएको, सीप सिके नसिकेको, मान्यता प्राप्त म्यानपावरबाट गए नगएको, वैदेशिक रोजगारीबाट फर्कनु पर्नाको कारण, फर्केर आएपछि व्यापार व्यवसाय गरे नगरेको जस्ता थुप्रै विवरण अध्यावधिक गर्नेछन् ।

प्रशिक्षण कार्यक्रमलाई सम्बोधन गर्दै महानगरका उपप्रमुख चित्रसेन अधिकारीले यो विवरण संकलन भएपछि वैदेशिक रोजगारीमा गएकाको यकिन तथ्यांक आउने र फर्केर आएकाले महानगरपालिकाबाट कस्तो अपेक्षा गरेका छन् भन्ने कुराको प्रष्ट खाका तयार बनाउन सहयोग पुग्ने जानकारी दिए। 

वैशाख १५, २०८० शुक्रबार १२:४०:२२ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।