दोस्रो वरीयतामा रहेको इंग्ल्याण्डमाथि बंगलादेश हावी, टी–२० सिरिज क्लिन स्वीप

काठमाडौं : इंग्ल्याण्डविरुछको टी–२० सिरिज घरेलु टोली बंगलादेशले क्लिन स्वीप गरेको छ।

मिरपुरको बांग्ला नेशनल स्टेडियममा भएको सिरिजको अन्तिम खेलमा घरेलु टोलीले इंग्ल्याण्डलाई १६ रनले पराजित गरेसँगै बंगलादेशले सिरिज क्लिन स्वीप गरेको हो।

यसअघि भएको पहिलो र दोस्रो खेल बंगलादेशले क्रमशः ६ विकेट र ४ विकेटले जितेको थियो। आईसीसी वरीयतामा इंग्ल्याण्ड दोस्रो स्थानमा हुँदा बंगलादेश नवौं स्थानमा छ।

मंगलबारको खेलमा टस हारेर पहिला ब्याटिङमा तानिएको बंगलादेशले निर्धारित २० ओभरमा २ विकेट गुमाएर १५८ रन बनायो।

उसका लागि लिट्टन दासले ७३ रनको अर्धशतकीय पारी खेल्दा रोनी तालुकदारले २४ रन जोडे। नजमुल होसिन सान्तो र सकिब अल हसनले अविजित रहँदै क्रमशः ४७ र ४ रन बनाए।

१५९ रनको जवाफी लक्ष्य पछ्याएको इंग्ल्याण्ड निर्धारित ओभरमा ६ विकेट गुमाएर १४२ रनमा समेटियो। उसका लागि डेविड मलानले ५३, जस बट्लरले ४०, बेन डुकेटले ११ रन ल्याए। क्रिस वाक्सले अविजित १३ रन जोडे।

बंगलादेशका टक्सिन अहमदले दुई तथा तनवीर इस्लाम, सकिब अल हसन र मुस्ताफिजुर रहमानले समान एक–एक विकेट लिए।

यसअघि भएको तीन खेलको एक दिवसीय सिरिज भने २–१ ले इंग्ल्याण्डले जितेको थियो।

फागुन ३०, २०७९ मंगलबार १८:४०:४४ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।