सेक्युरिटीलाई छक्याउँदै ‘मन्नत’को पर्खाल नाघेर तेस्राे तलासम्म पुगे शाहरुखका फ्यान
एजेन्सी : पठान स्टार शाहरुख खानको घर ‘मन्नत’मा दुई अज्ञात व्यक्ति प्रवेश गरेका छन्।
बिहीबार राति मुम्बईको बान्द्रास्थित ‘मन्नत’को सुरक्षा तोडेर १९–२० वर्षका दुई अज्ञात व्यक्ति तेस्रो तलासम्म पुगेका हुन्।
तेस्राे तल्लामा पुगेपछि उनीहरूलाई ड्युटीमा रहेका सुरक्षाकर्मीले समातेर प्रहरीलाई बुझाएका थिए।
सोधपुछका क्रममा दुवैले आफूहरू गुजरातबाट आएका र शाहरुख खानलाई भेट्न चाहेको खुलासा गरेका थिए।
रिपोर्टका अनुसार दुवै अज्ञात व्यक्ति मन्नतको पर्खाल भत्काएर भित्र पसे पनि शाहरुख भने घरमा थिएनन्। उनी आफ्नो फिल्म जवानको सुटिङमा थिए।
प्रहरीले विना अनुमति बंगलामा पस्ने लगायतका अन्य धारामा मुद्दा दर्ता गरी थप अनुसन्धान सुरू गरेको छ।
शाहरुख खानले चार वर्षको अन्तरालपछि यो वर्ष अलटाइम ब्लकबस्टर फिल्म पठानबाट फिल्ममा पुनरागमन गरेका छन्। पठानको सफलताले बक्स अफिसमा सफलतासँगै इतिहास रच्यो।
भारतमा ५ सय करोड र विश्वभर १ हजार करोडको आँकडा पार गरेको पठानले विश्वभरका दर्शकहरूको अथाह माया पाएका छन्। अहिले शाहरुख आफ्नो अर्को रिलिज फिल्म जवानको सुटिङमा व्यस्त छन्।
फागुन २०, २०७९ शनिबार २०:१९:४० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
