चुली युवा कपको उपाधि रुकुम पश्चिमलाई

सुर्खेत : वीरेन्द्रनगरमा जारी दोस्रो चुली युवा कप खुला पुरुष तथा महिला भलिबल प्रतियोगिताको उपाधि रुकुम पश्चिमले जितेको छ।
 

शुक्रबार  भएको फाइनल खेलमा आयोजक क्लब चुलीलाई हराउँदै रुकुम पश्चिमले उपाधि जितेको हो। फाइनलमा चुलीले पहिलो एक सेट जित्दा रुकुम पश्चिमले लगातार तीन सेट जितेर उपाधि चुमेको हो।

विजेताले नगद दुई लाख २० हजार र ट्रफि पाउँदा उपविजेताले एक लाख ५० हजार रूपैयाँ र ट्रफिमा चित्त बुझाएको छ। तेस्रो भएको सल्यान र चौथो भएको एपीएफ कर्णालीले क्रमशः ७५ हजार र ५० हजार नगदसहित ट्रफि पाए।

त्यसैगरी, महिलातर्फ भएको भलिबल प्रतियोगितामा एभरेष्ट क्लब बुटवलले उपाधि जित्दै नगद एक लाख ५० हजार र ट्रफि उचाल्यो।

उप–विजेता बनेको डाइमण्ड क्लब, काठमाडौंले ८० हजार, तेस्रो भएको आयोजक क्लब चुलीले ५० हजार र चौथो भएको सल्यानले ३० हजार नगद र ट्रफि पाए।

फागुन ११ गतेबाट भएको प्रतियोगितामा पुरुषतर्फ देश भरका १६ र महिलातर्फ १२ क्लबले सहभागी थिए।

फागुन १९, २०७९ शुक्रबार १५:४५:१५ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।