यू-१९ विश्वकपमा छनोट भएर नेपाल फर्कन्छौं : कप्तान देव खनाल
काठमाडौं : नेपाली टिमका कप्तान देव खनालले आफ्नाे टिम यू-१९ विश्वकपमा छनोट भएर नेपाल फर्किने बताएका छन्।
युएईमा आयोजना हुने यू-१९ विश्वकपको एशियाली छनोट प्रतियोगिता खेल्न जाने नेपाली टिमलाई बुधबार नेपाल क्रिकेट संघ (क्यान) ले बिदाइ गरेको छ।
बिदाइ कार्यक्रमपछि बोल्दै नेपाली टोलीका कप्तान देव खनालले अभ्यास राम्रो भएको र प्रतियोगितामा पनि राम्रो नतिजा लिएर स्वदेश फर्किने बताए।
‘टोलीमा मुख्यतः फास्ट बलिङ पक्ष राम्रो छ। छनोट प्रतियोगिताका सबै खेल फाइनल जत्तिकै महत्वपूर्ण छन्। सबै खेलमा सुखद् नतिजा निकाल्ने लक्ष्यका साथ टोली मैदानमा उत्रनेछ,’ उनले भने।
यस्तै नेपाली टोलीका प्रशिक्षक जगत टमाटाले भने नेपाली टोली सबै पक्षमा सन्तुलित भएको बताए।
यू-१९ विश्वकपको एशियाली छनोट फागुन १२ गतेदेखि युएईमा आयोजना हुँदैछ। प्रतियोगितामा नेपालसहित सिंगापुर, हङकङ, कुवेत, मलेसिया र आयोजक युएईको सहभागिता रहेको छ।
सिंगल राउण्ड रोबिनको आधारमा सञ्चालन हुने प्रतियोगिताको उपाधि विजेता एक टोलीले २०२४ मा श्रीलंकामा आयोजना हुने विश्वकप खेल्न पाउँनेछ।
फागुन १०, २०७९ बुधबार १२:४९:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
