जग्गा बेच्न हिंडेका व्यक्तिले आफ्नै जग्गा देखाएपछि थाहा भयो भूमाफियाको चलखेल, नक्कली लाल पुर्जा बनाएर बेच्ने तयारी
बुटवल : जग्गा बेच्न हिंडेका व्यक्तिले आफ्नै जग्गा देखाएको नौलो घटना रुपन्देहीमा भएको छ। त्यो पनि कसरी थाहा भयो भन्ने घटनाक्रम निकै रोचक छ।
बुटवल सुख्खानगरका निर्मल नेपाललाई साथी उमेश केसीले फोन गरेर आफ्ना साथीको जग्गा हरपुरमा रहेको भन्दै विक्री गरिदिन ग्राहक खोज्न भने।
आफ्नो साथीको १७ कट्ठा जग्गा रहेको र त्यसलाई विक्री गर्नुपर्ने भएकोले उमेशले निर्मललाई ग्राहक खोजिदिन आग्रह गरेका थिए।
यसपछि निर्मल विक्री गर्नुपर्ने जग्गा हेर्न साथी उमेश र अर्का एक जना साथी (जसको जग्गा हो) लाई लिएर तिलोत्तमाको मणिग्राम चोकदेखि पश्चिम हरपुरमा पुगे। हरपुरमा निर्मलको आफ्नै पुर्ख्यौंली जग्गा पनि थियो।
त्यहाँ पुगेपछि उमेश सहित आएका साथीले विक्री गर्न खोजिएको जग्गा देखाए। जब उमेशका साथीले जग्गा चिनाए, निर्मल छक्क परे। किनकी ती व्यक्तिले विक्री गर्न देखाइएको जग्गा त उनको आफ्नै जग्गा थियो।
.png)
आफ्नो सहित गाउँका १२ जनाको लाल पुर्जा भएको जग्गा अर्कैको भन्दै विक्री गर्न खोजिएकोमा निर्मल आश्चर्यमा परे। उनले त्यस जग्गा आफूसँगै गाउँका अरु १२ जनाको नाउँमा रहेको बताए पनि निर्मलको कुरा ती व्यक्तिले पत्याएनन्।
जग्गा देखाउन लगेका उमेशले सो जग्गा आफ्नै साथीको कम्पनीको नाममा दर्ता भएको र त्यहाँ जोतभोग गर्दै आएकाहरु सुकुम्बासी भएको समेत बताए।
ती व्यक्तिले मोवाइलबाट कित्ता नं १५७ लेखिएको लाल पुर्जा समेत देखाए। उक्त लाल पुर्जा ललितपुर ठेगाना भएको ग्रिनल्याण्ड विल्डर्सको नाममा बनाइएको थियो।
कम्पनी रजिष्टार कार्यालयमा दर्ता नं ३४००८/२०७६/०७७ रहेको ग्रिनल्याण्ड विल्डर्स तिलोत्तमा ७ भलवारीका काशी घिमिरेले दर्ता गरेको कम्पनी हो। हाल भने उक्त कम्पनी घिमिरेले नवलपरासीको बर्दघाटका भिमलाल भण्डारीका नाममा विक्री गरेको देखिएको छ।
हाल ग्रिनल्याण्ड विल्डर्सको स्वामित्व लिएका भिमलाल भण्डारीका अनुसार काशी घिमिरेले आफ्नो कम्पनीको नाममा १७ कठ्ठा १० धुर जग्गा रहेको र सो समेत बेचबिखन गर्ने हो भन्दै प्रस्ताव ल्याएपछि उनले जग्गा समेत हुनेगरी कम्पनी खरिद गरेका थिए।
घिमिरे उनै व्यक्ति हुन जसलाई रुपन्देहीका अधिकांश जग्गाहरुको नक्कली लाल पुर्जा बनाउने र बेचबिखन गर्ने काममा सक्रिय रहेको भन्दै मालपोत कार्यालय बुटवलले अनुसन्धानका लागि प्रहरीको केन्द्रिय अनुसन्धान ब्युरोदेखि अख्तियार दुरुपयोग अनुसन्धान आयोग सम्मलाई पत्राचार गरेको छ।
को हो त वास्तविक जग्गा धनी?
तिलोत्तमा नगरपालिका वडा नं ६ मा रहेको हरपुर गाउँ २०२१ सालभन्दा अघिदेखि बस्दै आएकाहरुको बस्ती हो।
हालको तिलोत्तमा नगरपालिका वडा नं ६ मा पर्ने साबिक आनन्दवन ७ ख कित्ता नं १५७ को त्यो जग्गा २०२२ सालमा निर्मलका बुवाले किनेको गाउँ ब्लकको जग्गा हो।
त्यसमा निरन्तर नेपाल परिवारले खनजोत गर्दै आएको छ। २०३८ सालमा तिनाउ नदिमा आएको बाढीले त्यो बस्तीलाई खण्डहर बनायो। कतिपय त्यहाँ बाट बसाईं सरे। तर गाउँ ब्लकको जग्गा भएकोले उनीहरुको नाममा लाल पुर्जा आइसकेको थिएन।
२०७१ सालमा गाउँ ब्लकको जग्गा नापजाँच र दर्ता गर्न सरकारले आयोग गठन गरेपछि त्यही आयोगको निर्णयले जोतभोग गर्दै आएका बासिन्दाले लाल पुर्जा पाए।
१५७ नम्बरको उक्त कित्तालाई २०७१ सालमा फोड गरी जग्गाको जोतभोग गर्दै आएका परिवारका नाममा आनन्दवन ७ ख २, ३, ४, ५ गरी क्रमशः १५ सम्म कायम गरिएको थियो। सोहि अनुसार नाप नक्सा गरी लाल पुर्जासमेत दिइएको मालपोत कार्यालयको अभिलेखबाट देखिन्छ।
(2).png)
तिलोत्तमा नगरपालिका वडा नं ६ का वडा अध्यक्ष गणेश पाठकका अनुसार मालपोत कार्यालय बुटवलको अभिलेखमा उक्त कित्ता नं १५७ लाई फोड गरेर २०७१ सालमा १३ कित्ता कायम भइसकेको कित्ता फेरी एकीकृत गरी भूमाफियाले दर्ता गरेको सुन्दा लाल पुर्जा हातमा लिएर बसेकाहरु छक्क परेका छन्।
त्यही मध्येका एक जग्गाधनी कृष्ण बहादुर अर्याल क्षेत्रीले आफूहरुले २०२२ सालमा जग्गा खरिद गरी निरन्तर जोतभोग गर्दै आएको र २०७१ सालमा आयोग बनेपछि भने नापजाँच गरेर लाल पुर्जा लिएको बताए। साथै उनले २०७१ देखि वडा कार्यालयमा तिरो समेत बुझाउँदै आएको उल्लेख गरेका छन्।
अहिले आफ्नो जग्गाको लाल पुर्जा अर्कै व्यक्तिको नाममा आएको छ भन्ने थाहा पाउँदा पत्याउनै गाह्रो भएको उनले बताए।
उनी मात्र हैन हरपुरका गोविन्द खराल पनि अहिले आफ्नो जग्गामा अरुको लाल पुर्जा बनेको सुन्दा छक्क परेका छन्।
‘२०३१ सालतिर मैले त्यहाँ जग्गा किनेको हुँ। नौ वर्ष अघि १५७ नं. को एउटै कित्ता रहेपनि २०७१ सालमा कित्ता फोड गरि बीचमा बाटो कायम भयो। तर अहिले यो जग्गा अरुको नाममा छ भन्दा अचम्ममा परेको छु,’ उनले भने।
खराल जस्तै धेरैका नाउँमा रहेका जग्गा २०७८ साल फागुन ६ गते पुनः २०७१ साल पहिलेकै जस्तै कित्ता नं १५७ नै कायम गरि १७ कठ्ठा १० धुर जग्गाको लाल पुर्जा ग्रिनल्याण्ड विल्डर्सको नाममा बनेको पाइएको छ।
जग्गाको लाल पुर्जा लिएर जोतभोग गर्दै आएकाहरु अहिले साथमा भएको लाल पुर्जा लिएर भूमाफियाले हडप्न लागेको जग्गा जोगाउन अख्तियार र मालपोत धाउन थालेका छन्।
(3).png)
चारकिल्ला र जग्गा रोक्का प्रमाणपत्र समेत नक्कली
१४ परिवार गाउँलेको १७ कट्ठा १० धुर जग्गाको नक्कली लाल पुर्जा ग्रिनल्याण्ड विल्डर्सको नाममा बनाएका काशी घिमिरेले उक्त जग्गा सहकारीमा राख्दा चारकिल्ला प्रमाण र जग्गा रोक्काको प्रमाणपत्र पनि नक्कली बनाएको पाइएको छ।
उनले सोही जग्गा धितो राखेर काठमाण्डौंको काँडाघारीमा रहेको सहकाली सहकारीबाट झण्डै तीन करोड ऋण लिएको देखिएको छ।
घिमिरेले २०७८ साल फागुन २२ गते सहकारीबाट २ करोड ७० लाख ऋण लिएका थिए। ऋण लगानी गर्दा सहकारीका संचालकहरु तिलोत्तमाको फिल्डमै पुगेर जग्गा समेत हेरेर आएको दावी सहकारीले गरेपनि उनले ऋण लिँदा प्रयोग गरेका सबै कागजपत्र नक्कली भएको भेटिएको छ।
(2).png)
वडा कार्यालयबाट प्रमाणित गरेका चारकिल्ला नक्कली छ भने मालपोत कार्यालय बुटवलको जग्गा रोक्काको पत्र पनि नक्कली रहेको छ।
वडा कार्यालयबाट प्रमाणित भएको चारकिल्लामा यसअघिका वडा अध्यक्ष शुकदेव न्यौपानेको हस्ताक्षर राखिएको भएपनि अहिले वडामा हेर्दा उक्त नामको कुनै पनि जग्गाको चार किल्ला बनाएको अभिलेख भेटिंदैन। मालापोत कार्यालयमा पनि सो नामको जग्गा रोक्का पत्र भेटिंदैन।
मालपोत अधिकृत घनश्याम अर्यालले उक्त जग्गा रोक्का राखिएको कुनै अभिलेख नभएको बताएका छन्। साथै तिलोत्तमा ६ का वडा अध्यक्ष गणेश पाठकका अनुसार पनि वडा कार्यालयमा उक्त जग्गाको चारकिल्ला बनाएको कुनै अभिलेख रहेको छैन।
फागुन १०, २०७९ बुधबार ०९:०२:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
