पोखरीमा डुबेको अवस्थामा मृत भेटिए हिजोदेखि हराइरहेका ४ वर्षीय बालक
पोखरा : पोखराको पस्र्याङबाट सोमबार साँझदेखि हराइरहेका चार वर्षीय बालक मृत अवस्थामा फेला परेका छन्।
पोखरा महानगरपालिका –५ पस्र्याङको धारापानी बस्दै आएका चार वर्षीय सुहान केसी खुँडे पोखरीमा डुबेको अवस्थामा मृत भेटिएका हुन्।
साँझ ७ बजेतिर घरबाट खेल्न निस्केका केसी अबेरसम्म घर नफर्केपछि परिवारले प्रहरीलाई खबर गरेको थियो।
बालक हराएको जानकारी पाएपछि खोज्ने क्रममा खटिएको प्रहरीको टोलीले केसीलाई पोखरीमा डुबेर मृत्यु भएको अवस्थामा भेटाएको जिल्ला प्रहरी कार्यालय कास्कीका प्रहरी निरीक्षक ज्ञान खड्काले बताए।
सशस्त्र प्रहरी बलको रेस्क्यु टोलीको सहयोगमा बैदाम प्रहरीले पोखरीबाट बालकको शव निकालेको हो। बालकको शवलाई पोष्टमार्टमका लागि पश्चिमाञ्चल क्षेत्रीय अस्पतालमा राखिएको खड्काले बताए।
बालक खेल्नेक्रममा पोखरीमा खसेको हुन सक्ने प्रहरीको अनुमान छ। घटनाबारे थप अनुसन्धान भइरहेको प्रहरीले जनाएको छ।
फागुन ९, २०७९ मंगलबार १७:३३:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
