दयाहाङ र मिरुनाको फिल्म 'जारी' को काव्यिक टिजर हिट, फिल्म के होला ?
काठमाडौं : उपेन्द्र सुब्बाको लेखन अनि निर्देशनमा बनेको फिल्म जारी’ को टिजर हिट भएको छ। पूर्वी पहाडको लिम्बू समुदायको परम्परामा आधारित यो फिल्मबाट सुब्बा फिल्म निर्देशनमा डेब्यु गर्दैछन्। दुई दिन अगाडि ओएरआरबाट युट्युबमा रिलिज भएको टिजर चार लाख ४३ हजारले हेरिसकेका छन्।
संवादहीन काव्यिक टिजर दुई मिनेट ४६ सेकेन्ड लामो छ। काव्यिक टिजर धेरैले मन पराउँदै सामाजिक सञ्जालमा प्रशंसा गरेका छन्। दयाहाङ राई अनि मिरुना मगरको सम्बन्धको उतारचढाव समेटिएको टिजरमा यी दुवै कलाकार हाबी छन्।
फिल्म जारी प्रथामाथि बनेको हो। यसमा दयाहाङ र मिरुनासँगै प्रेम सुब्बा, विजय बराल, रेखा लिम्बू, रोयदीप श्रेष्ठ, कमलमणि नेपाल, पुष्कर गुरुङलगायत कलाकारहरूको समेत अभिनय रहेको छ।
कथा सुरेश लिम्बूको हो भने रैथाने सङ्गीतलाई अगाडि बढाइरहेकी झुमा लिम्बू र गङ्गा थापाको सङ्गीत रहेको छ। शैलेन्द्र कार्कीको छायाङ्कन र निमेष श्रेष्ठको सम्पादन रहेको फिल्मको निर्माता रामबाबु गुरुङ हुन्।
यस अगाडि दयाहाङ अनि मिरुनाको अभिनय रहेको कबड्डी ४ ले नेपाली फिल्मको व्यापारमा रेकर्ड बनाएको थियो। २०८० वैशाख १ गते रिलिज डेट रहेको फिल्म टिजर जत्तिकै बलियो भए यसले सुस्ताइरहेको नेपाली फिल्मको व्यापार तताउन सक्छ।
फागुन ४, २०७९ बिहीबार १७:४४:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
