‘बहाव’को फस्टलुकमा सिरियस देखिएकी अभिनेत्री सुरक्षा
काठमाडौं : फिल्म ‘बहाव’को फस्टलुकमा अभिनेत्री सुरक्षा पन्त पिजडामा रहेको सुगासँगै देखिएकी छिन्। फिल्ममा पन्तसँगै कमलमणि नेपालले समेत अभिनय गरेका छन्। चैत २४ गतेबाट प्रदर्शनमा आउन लागेको फिल्मको सोमबार फस्टलुक सार्वजनिक गरिएको हो।
फिल्मको निर्देशन प्रमोद कँडेलले गरेका हुन्। उनले सुरक्षामार्फत फिल्मको थिमलाई प्रस्तुत गरिएको बताए। अभिनेत्री सुरक्षाले जिज्ञासाका साथ जीवन जिउने व्यक्ति विभिन्न उतारचढावका परिस्थितिहरूबाट गुज्रिएको अवस्थामा त्यसबाट अघि बढ्दा आउने हलचललाई कसरी सन्तुलित रुपमा अगाडि बढाउन सकिन्छ भन्ने कथा देखाइएको बताइन्।
फिल्मका निर्माता श्रीधर पौडेल हुन्। उनले यसअघि नेपाल सरकारबाट ‘राष्ट्रिय अवार्ड’ प्राप्त फिल्म ‘गोपी’ निर्माण गरेका थिए। पौडेलले आफ्नो स्वन्त्रता आफैँमा कैद गर्नेहरूका लागि मार्गप्रशस्त गर्ने कथा ‘बहाव’मा रहेको जनाए।
फिल्ममा पन्त र नेपालसँगै अफरान अली, सुर्य शर्मा भट्ट, इश्वरी सिंह, हीरालाल कँडेल र पवन श्रेष्ठको अभिनय छ। सुजन बडालको सम्पादन, वसन्त सापकोटा, सुशान्त गौतम र रिकेश गुरुङको सङ्गीत रहेको फिल्ममा सज्जा चौलागाईंको स्वर,अनन्त घिमिरेको कलर करेक्सन, मुकेश शाहको साउण्ड डिजाइन र मिक्सिङ र कार्तिकेय स्मिता कर्नाटकको छायाङ्कन छ।
फिल्मलाई आरआर फिल्मस्ले वितरण गर्दैछ।
फागुन १, २०७९ सोमबार १८:०४:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
