श्रोत नखुलेको आठ लाख रुपैयाँसहित एक जना सशस्त्र प्रहरीको नियन्त्रणमा
काठमाडौं: सशस्त्र प्रहरी बल नेपाल बीओपी वीरगञ्जले श्रोत नखुलेको आठ लाख नेपाली रुपैयाँसहित माघ २९ गते एक जनालाई नियन्त्रणमा लिएको छ। सशस्त्र प्रहरीले पर्सा जिल्लाको वीरगञ्ज महानगरपालिका- १६ स्थित शंकराचार्य गेटबाट सोही महानगरपालिका १६ ईनर्वा बस्ने २५ वर्षीय प्रवेश कुमारलाई नियन्त्रणमा लिएको हो।
बीआर ०५ एभी ३४७७ नम्बरको मोटरसाइकलमा भारतबाट नेपालतर्फ आउँदै गरेका उनले हेल्मेटभित्र लुकाई छिपाई ल्याउँदै गरको उक्त रुपैयाँको श्रोत खुलाउन नसकेपछि नियन्त्रणमा लिइएको हो।
सशस्त्र प्रहरीले उनको साथबाट एक हजार दरको ७५० वटा र एक सय दरको ५०० वटा नोट फेला पारेको थियो। उनलाई बरामद रुपैयाँसहित आवश्यक कारबाहीको लागि जिल्ला प्रहरी कार्यालय पर्सामा बुझाइएको छ।
फागुन १, २०७९ सोमबार ०७:२२:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
