रुपन्देही सुपरलिग क्रिकेट : साई ग्लोबल एकेडेमी विजयी

भैरहवा : रुपन्देही सुपर लिग क्रिकेट प्रक्रियोगिता अन्तर्गत डिभिजन ‘बी’को आइतबार भएको खेलमा साई ग्लोबल एकेडेमी विजयी भएको छ। साई ग्लोबलले गोलपार्क क्रिकेट क्लबलाई ३८ रनले पराजित गर्दै जित निकालेको हो।

सिद्धार्थ रंगशालामा टस जितेर पहिले ब्याटिङ गरेको साई ग्लोबलले निर्धारित ३८ ओभरको खेलमा ३३.४ ओभरमा सबै विकेट गुमाएर ११२ रनको योगफल बनायो।

उसका लागि आषिश रोक्काले ३८, ऋषि रानाले २८ र अभिजित ज्ञवालीले १४ रन जोडे। गोलपार्कका दिवान पुनले ९ ओभर बलिङ गर्दै ४ मेडन राख्दै १० रन खर्चेर ६ विकेट लिए। 

जवाफी ब्याटिङ गरेको गोलपार्क १७ ओभरमा सबै विकेट गुमाउँदै ७४ रनमै समेटियो। उसका लागि आदित्य बन्जाडेले १४ र गगन अधिकारीले १३ रन बनाए पनि अन्य ब्याट्सम्यानले दोहोरो अंक जोड्न सकेनन्।

बलिङमा साई ग्लोबलका आरिफ खाँनले ५, विवेक कोहाँरले ३ तथा अनिल यादवले १ विकेट दिए। 

रुपन्देही क्रिकेट संघको आयोजनामा सुरु भएको प्रतियोगितामा ए डिभिजनका ८ र बी डिभिजनका १२ गरी २० टिमको सहभागिता रहेको छ।

माघ २९, २०७९ आइतबार १८:११:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।