फिफा बेस्ट मेन्स अवार्डका अन्तिम तीन : मेस्सी, एम्बाप्पे र बेञ्जिमा
एजेन्सी: अर्जेन्टिनाका विश्वप्रख्यात खेलाडी लियोनल मेस्सीसहित फ्रान्सका स्टार खेलाडीहरू किलियन एम्बाप्पे र करिम बेञ्जिमा फिफा बेस्ट मेन्स अवार्ड २०२२ को अन्तिम तीनको सूचीमा परेका छन्। वर्षको उत्कृष्ट पुरुष खेलाडीलाई दिइने उपाधि अब यी तीनमध्ये एकलाई दिइनेछ।
मेस्सीले यस वर्ष अर्जेन्टिनालाई विश्वकपको उपाधि दिलाएका थिए भने एम्बाप्पेको उत्कृष्ट प्रदर्शनमा फ्रान्स उपविजेता भएको थियो। यस्तै बेञ्जिमाले रियल मड्रिडलाई च्याम्पियन्स लिग जिताएका थिए।
१४ जनाको शर्टलिस्टबाट उनीहरू अन्तिम तीनको सूचीमा परेका हुन्। यो उपाधिको टुङ्गो फेब्रुअरी २७ मा लाग्नेछ।
सन् २०२१ को अगस्टदेखि सन् २०२२ को डिसेम्बर १८ सम्म गरिएको प्रदर्शनको आधारमा विभिन्न राष्ट्रिय टोलीका प्रशिक्षक, कप्तान, पत्रकार र खेलप्रेमीहरूको मतले विजेता चुनिनेछ।
माघ २८, २०७९ शनिबार १०:१४:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
