सुदूरपश्चिमका मुख्यमन्त्री रावल पदमुक्त, अब कांग्रेसबाट मुख्यमन्त्री नियुक्त हुने
काठमाडौं : सुदूरपश्चिम प्रदेशका मुख्यमन्त्री राजेन्द्र सिंह रावल पदमुक्त भएका छन्।
मुख्यमन्त्रीले विश्वासको मत दिन प्रदेशसभामा गरेको प्रस्तावमाथि छलफलको प्रस्ताव नै बहुमतले अस्वीकृत भएपछि उनी पदमुक्त भएका हुन्।
त्यसअघि उनले लामो सम्बोधन गरेर आफूलाई विश्वासको मत दिन आग्रह गरेका थिए। तर निर्णायक मानिएको नागरिक उन्मुक्तिका सबै ७ सांसद प्रदेशसभा बैठकमा अनुपस्थित भएपछि मुख्यमन्त्रीले विश्वासको मत पाउन सकेनन्।
२७ पुसमा नाउपासमेतको समर्थनमा मुख्यमन्त्री नियुक्त भएका रावलले संविधान अनुसार ३० दिनभित्र विश्वासको मत लिनुपर्ने थियो।
सुदूरपश्चिम मुख्यमन्त्री : रावलले दिए राजीनामा, शाहको दाबी कुर्दै प्रदेश प्रमुखको कार्यालय
संविधानको धारा १६८ को उपधारा ३ बमोजिम मुख्यमन्त्रीले विश्वासकाे मत पाउन नसकेमा प्रदेश प्रमुखले प्रदेश सभामा सबैभन्दा बढी सदस्यहरू भएको संसदीय दलको नेतालाई मुख्यमन्त्री नियुक्त गर्ने व्यवस्था छ।
यो प्रदेशमा सबैभन्दा बढि सदस्य नेपाली कांग्रेसको रहेको छ। प्रदेशसभामा उनका १९ सांसद् छन् भने दोस्रोमा रहेको माओवादी केन्द्रका १० सांसद् छन्। कमलबहादुर शाह कांग्रेस सुदूरपश्चिम प्रदेश संसदीय दलको नेता हुन्।
माघ २६, २०७९ बिहीबार १७:५१:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
