सम्पत्ति शुद्धीकरण कानुनको उलङ्घन गर्दा चार बैङ्कलाई राष्ट्र बैंकले गर्यो २ करोड जरिवाना
काठमाडौँ : नेपाल राष्ट्र बैङ्कले ९ वटा वाणिज्य बैङ्कका अध्यक्ष, सञ्चालक र सीईओलाई कारबाही गरेको छ। सम्पत्ति शुद्धीकरण लगायतका कानुनको उलङ्घनको आरोपमा राष्ट्र बैङ्कले उनीहरूलाई कारबाही गरेको जनाएको छ।
कारबाहीमा परेका नौ बैङ्कका अधिकारीहरूमध्ये चार बैङ्कका अधिकारीहरूलाई ५० लाखको दरले दुई करोड जरिवाना समेत गरेको छ।
कुमारी, प्रभु, तत्कालीन नेपाल इन्भेस्टमेन्ट, नबिल, माछापुच्छ्रे,सानिमा, सिभिल, प्राइम, तत्कालीन बैङ्क अफ काठमाडौँका अधिकारीहरूलाई कारबाही गरेको हो।
प्रभु, कुमारी, तत्कालीन बैङ्क अफ काठमाडौँ र प्राइम बैङ्कलाई सम्पत्ति शुद्धीकरण सम्बन्धी ऐन र निर्देशनको उलघंन गरेको भन्दै ५० लाखको दरले जरिवाना गरेको छ।
जोखिम भारित सम्पत्ति गणना नगरेका कारण पुँजीकोष पर्याप्तताको यथार्थ विवरण पेस नगरेको भन्दै राष्ट्र बैङ्कले माछापुच्छ्रे बैङ्कका सीईओलाई सचेत गराएको छ।
बैङ्क तथा वित्तीय संस्था सम्बन्धी कानुन विपरीत तत्कालीन सीईओलाई थप सुविधा दिएको भन्दै कुमारी बैङ्कलाई सचेत गराएको छ।
तत्कालीन नेपाल इन्भेस्टमेन्ट बैङ्क, माछापुच्छ्रे र सिभिल बैङ्कलाई बैङ्क तथा वित्तीय संस्थालाई जारी गरिएको एकीकृत निर्देशन २०७८ को निर्देशन नं. १५/३/८ मा ’एक पटक प्रिमियम दर निर्धारण गरी ऋणीलाई दिइने कर्जा प्रस्ताव पत्रमा उल्लेख गरी कर्जा प्रवाह गरे पश्चात् प्रिमियम दर वृद्धि गर्न वा कुनै किसिमको डिस्काउन्ट प्रदान गरी पुनः स्वतः वृद्धि हुने जस्ता योजना लागू गर्न नपाइने व्यवस्था उलङ्घन गरेको भन्दै बैङ्कको प्रमुख कार्यकारी अधिकृतलाई सचेत गराइएको छ।
सम्पत्ति शुद्धीकरण तथा आतङ्कवादी कार्यमा वित्तीय लगानी निवारण सम्बन्धी व्यवस्था अनुसार ग्राहक पहिचान सम्बन्धी व्यवस्था कार्यान्वयन नभएको भन्दै नबिल बैङ्कलाई सचेत गराएको राष्ट्र बैङ्कले जानकारी दिएको छ।
माघ २५, २०७९ बुधबार २०:३३:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
