साथीको पिठ्यूँमा चढेर शाहरुखको ‘पठान’ हेर्न पुगे यी युवा

एजेन्सी: शाहरुख खानको ‘पठान’ यतिबेला निकै चर्चित छ। पहिलो दिनमै विश्वभर १०० करोड भारु कमाउने यो पहिलो बलिउड फिल्म बनेको छ।

भारतीय बक्स अफिसको कुरा गर्ने हो भने फिल्मले दोस्रो दिन १२७ करोड भारुको कमाइ गरेको थियो। यसले ‘पठान’लाई अहिलेसम्मकै ठूलो ओपनिङ गर्ने बलिउड फिल्म पनि बनाएको छ।

फिल्मको कमाइले नै अनुमान गर्न सकिन्छ यो फिल्म हेर्न दर्शक कत्तिको पागल भइरहेका छन् भन्ने। सिनेमा हलहरू हाउसफुल भइरहेका छन्। यसैबीच शाहरुख खानका एक ठूला फ्यान चर्चामा आएका छन्, जो साथीको पिठ्यूँमा चढेर शाहरुखको फिल्म हेर्न गएका थिए। अपाङ्गता भएका ती व्यक्तिप्रति थुप्रैले सहानुभूतिको शब्द पनि प्रकट गरेका छन्।

एक भाइरल भिडियोमा चर्चामा आएका ती व्यक्ति आफ्नो साथीको पिठ्यूँमा चढेका छन् र पत्रकारले उनलाई केही प्रश्न सोधिरहेका छन्। पत्रकारले ती व्यक्तिलाई कहाँबाट आएको भनेर सोध्छन्। जवाफमा आफू शाहरुखको फिल्म हेर्न बिहारको भागलपुरबाट पश्चिम बंगालको माल्दा पुगेको बताउँछन्। उनी माल्दास्थित सम्सी पवन टकीज सिनेमा हल पुगेका थिए।

भाइरल भइरहेको यो भिडियो निकै भावुक बनाउने पनि छ। सामाजिक सञ्जालमा हेरेपछि मानिसहरूले विभिन्न प्रतिक्रिया दिइरहेका छन्।

एक प्रयोगकर्ताले त यी व्यक्तिलाई 'वास्तविक नायक'को रूपमा पनि वर्णन गरेका छन्। यसले शाहरुख खानको लोकप्रियतालाई संकेत गर्ने पनि धेरैले बताइरहेका छन्।

यसैबीच एक प्रयोगकर्ताले भनेका छन्- ‘मैले यस्तो पागलपन कतै देखेको छैन। यसै क्रममा एक फ्यानले शाहरुख खानलाई मानिसहरूको माया यस्तो पनि हुँदोरहेछ भनी बताइरहेका छन्।

माघ १६, २०७९ सोमबार १३:३७:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।