श्रीमती र दुई वर्षीय छोरामाथि पेट्रोल छर्केर आगो लगाए, छोराको मृत्यु श्रीमती गम्भीर घाइते

काठमाडौं: बाँकेको कोहलपुर नगरपालिकामा एक युवकले आफ्ना छोरा र श्रीमतीलाई आगो लगाउँदा छोराको आज बिहान मृत्यु भएको छ। घटनामा श्रीमती ३० वर्षीया गंगा विक गम्भीर घाइते भएकी छन्। 

आइतबार साँझ कोहलपुर- १ शान्तिनगर बस्ने ३२ वर्षीय भानुभक्त विकले घरायसी झगडामा श्रीमती र दुई वर्षे छोरा प्रिन्सलाई पेट्रोल छर्केर आगो लगाएका थिए। 

आगोले जलेर प्रिन्सको मृत्यु भएको जिल्ला प्रहरी कार्यालय, बाँकेका प्रहरी नायव उपरीक्षक रामप्रसाद घर्तीले जानकारी दिए। प्रिन्सको भेरी अस्पताल नेपालगञ्जमा उपचारको क्रममा मृत्यु भएको हो।

गंगाको घाँटी र ढाड जलेको छ। उनको पनि सोही अस्पतालमा उपचार भइरहेको छ।

आरोपीलाई भारततर्फ भाग्दै गरेको अवस्थामा प्रहरीले पक्राउ गरिसकेको छ। दिल्ली जाने बस चढेर भागेका भानुभक्तलाई गए राति पक्राउ गरिएको र घटनाको अनुसन्धान थालिएको  घर्तीले बताए।

कोहलपुर नगरपालिकाकी उपमेयर संगीता सुवेदीका अनुसार भानुभक्तले एक वर्ष अगाडिदेखि नै श्रीमती गंगालाई कुटपिट गर्दथे। आइतबार पनि बिहानैदेखि दुई जनाबीच झगडा भएको थियो।

माघ १६, २०७९ सोमबार १२:२३:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।