धनुषामा पर्खाल भत्काएर ६ थुनुवा फरार

काठमाडौं: धनुषाको क्षिरेश्वरनाथ नगरपालिकामा रहेको ईलाका प्रहरी कार्यालय महेन्द्रनगरको हिरासत कक्षबाट पर्खाल भत्काएर ६ जना थुनुवा फरार भएका छन्। सात जना थुनुवामध्ये ६ जना पर्खाल भत्काएर भागेका हुन्।

गए राति फरार हुने थुनुवाहरूमा लागूऔषध मुद्दाका आरोपित विनोदकुमार शर्मा, हातहतियार मुद्दाका रोशन महतो र शंकर सिंह, सार्वजनिक अपराध मुद्दाका अमित मण्डल र रोशन यादव, अभद्र व्यवहार मुद्दाका आरोपित हसिम सिंह र रोशन महतो रहेको जिल्ला प्रहरी कार्यालय धनुषाले जनाएको छ।

यस्तै सवारी मुद्दाका आरोपित एक जना थुनुवा भने भागेनन्। थुनुवा राखेको हिरासत कक्षको भवन पुरानो र कमजोर भएकाले उनीहरू भाग्न सफल भएको बताइएको छ। 

फरार थुनुवाहरूको खोजी भइरहेको प्रहरीले जनाएको छ। यस्तै घटनाको छानबिनका लागि समिति समेत बनाइने भएको छ।

माघ १६, २०७९ सोमबार ०९:३१:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।