मातेका श्रीमान्ले घाँटी थिचेर गरे आफ्नै श्रीमतीको हत्या, मल खाडीमा पुरेपछि प्रहरीद्वारा पक्राउ
काठमाडौं: भोजपुरको अरुण गाउँपालिका- २ का ५५ वर्षीय ज्ञानबहादुर श्रेष्ठलाई आफ्नै श्रीमतीको हत्या गरेको आरोपमा प्रहरीले पक्राउ गरेको छ। शनिबार अपराह्न ४ बजे श्रीमान् श्रीमतीबीच घरायसी कुरामा विवाद हुँदा आवेगमा आई श्रेष्ठले ४१ वर्षीया श्रीमती गंगा श्रेष्ठको घाँटी थिचेर हत्या गरेका थिए।
उनले मल खाडीमा श्रीमतीको शव पुरेको भन्ने सूचना पाएसँगै प्रहरी चौकी प्याउलीबाट खटिएको प्रहरी टोलीले श्रेष्ठलाई पक्राउ गरेको हो। मादक पदार्थ सेवन गरी घर आएका श्रेष्ठले मादक पदार्थको सनकमा श्रीमतीको हत्या गरेको र हत्यापश्चात् घटनालाई ढाकछोप गर्न नजिकै रहेको मल खाडीमा खाल्डो खनी पुरेको प्रारम्भिक अनुसन्धानको क्रममा खुल्न आएको जिल्ला प्रहरी कार्यालय भोजपुरले जनाएको छ।
घटना सम्बन्धमा थप अनुसन्धान भइरहेको उक्त कार्यालयले जनाएको छ।
माघ १५, २०७९ आइतबार १३:३५:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
