यतीको विमान दुर्घटनामा बेपत्ता भएका एक यात्रुको खोजी जारी : नेपाली सेना
काठमाडौं: नेपाली सेनाले यती एयरको विमान दुर्घटनामा बेपत्ता भएका एक यात्रुको खोजी जारी रहेको बताएको छ। कास्कीको पोखरास्थित सेती खोँचमा चालक दलसहित ७२ यात्रु सवार यती एयरको विमान गत माघ १ गते दुर्घटनामा परेको थियो।
नेपाली सेना, नेपाल प्रहरी र सशस्त्र प्रहरीको संयुक्त टोलीले खोज तथा उद्धारको क्रममा ७१ जनाको शव फेला पारेको थियो। एक जना अझै भेटिएका छैनन्।
कास्की जिल्ला सुरक्षा समितिको बैठकले माघ ७ मा दुर्घटनास्थलमा खोज तथा उद्धारमा खटिएको टोलीलाई फिर्ता गर्ने निर्णय गरे पनि दुर्घटनामा परेकामध्ये एक जनाको अवस्था अझै अज्ञात रहेकाले खोजी कार्य जारी रहेको सैनिक प्रवक्ता कृष्णप्रसाद भण्डारीले बताए।
विमानको ब्ल्याक बक्स भेटिइसकेको छ भने घटनाको अनुसन्धान पनि जारी छ।
माघ १४, २०७९ शनिबार ११:५८:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
