मोरङ र सुनसरीका छुट्टाछुट्टै स्थानमा दुर्घटना: तीन जनाको मृत्यु
काठमाडौं: मोरङ र सुनसरीको छुट्टाछुट्टै स्थानमा सवारी दुर्घटना हुँदा तीन जनाको मृत्यु भएको छ। हिजो बिहान ९ बजे मोरङको विराटनगर महानगरपालिका- ३ ढाटमा को३८प ५३८७ नम्बरको स्कुटर र प्रदेश१-०४-००१ ब ०००७ नम्बरको मोटरसाइकल एकआपसमा ठोकिएर दुर्घटना भएको थियो।
दुर्घटनामा मोटरसाइकल चालक धरान उप-महानगरपालिका-८ सुनसरीका ५५ वर्षीय प्रेमबहादुर श्रेष्ठको उपचारको क्रममा विराट मेडिकल कलेजमा मृत्यु भएको हो।
हिजै साँझ ५ बजे सुन्दरहरैचा नगरपालिका- ७ स्थित भित्री सडकखण्डमा को२त ७९३७ नम्बरको ट्र्याक्टरबाट लडी घाइते भएका सहचालक सुन्दरहरैचा- ७ का २२ वर्षीय श्यामबहादुर मगरको उपचारको क्रममा नोबेल अस्पताल विराटनगरमा मृत्यु भएको छ।
यसैगरी सुनसरीको इटहरी- १२ स्थित कोशी लोकमार्गमा प्रदेश१-०४-००१ च ०१९८ नम्बरको पिकअपले साइकलयात्री गढी गाउँपालिका-१ सुनसरीका ६० वर्षीय आनन्द चौधरीलाई ठक्कर दिँदा घाइते भएका चौधरीको उपचारको क्रममा धरान घोपामा मृत्यु भएको हो।
घटना सम्बन्धमा प्रहरीबाट थप अनुसन्धान भइरहेको छ।
माघ १२, २०७९ बिहीबार ११:४३:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
