फ्राइडे रिलिज : रमेशको डेब्यु फिल्म 'तिम्रो मेरो साथ' अर्का डेब्यु निर्देशकको ‘गुञ्जन’सँगै प्रतिस्पर्धामा

काठमाडौं: शुक्रबारबाट नेपाली सिनेमा हलमा ‘तिम्रो मेरो साथ’ र ‘गुञ्जन’ को प्रदर्शन सुरु भएको छ। दुवै प्रेमकथामा आधारित फिल्म हुन्।

'तिम्रो मेरो साथ'मा साम्राज्ञी राज्यलक्ष्मी शाह, पुष्प खड्का र सन्दीप क्षेत्रीको मुख्य भूमिका छ। यस चलचित्रको चितवनमा प्रिमियर भएको थियो।

साम्राज्ञी र पुष्पको जोडीलाई दर्शकले रुचाएमा दुवै जोडी बनेको धेरै फिल्म आउनसक्छ। तर केमिस्ट्री मिल्न कठिन देखिन्छ। यो रमेश एमके पौडेलको निर्देशनमा बनेको फिल्म हो भने यो उनको डेब्यु निर्देशन पनि हो।

फिल्मको कार्यकारी निर्माण र लेखन सवीर श्रेष्ठको हो। फिल्म शिव ढकालको छायाङ्कन, सुवाष भुसाल-योगेश काजीको सङ्गीत, रामजी लामिछानेको कोरियोग्राफी र भूपेन्द्र अधिकारीको सम्पादनमा तयार भएको छ।

यस्तै द्वन्द्व निर्देशकका रूपमा दुई दशकदेखि सक्रिय अष्टमान महर्जनले ‘गुञ्जन’मार्फत चलचित्र निर्देशनमा डेब्यु गरेका छन्। हीराकृष्ण शाहीको प्रस्तुति र सुनिता शाहीको निर्माणमा बनेको फिल्ममा सारा सिर्पाली, कविर खड्का, प्रितमराज सेन्चुरी, सरोज खनाल, हिउँवाला गौतम, ऋचा थापा, रोहन शाही, निरुता स्याङतान, कञ्चन चालिसे, सुस्मिता बराल लगायतले अभिनय गरेका छन्।

चलचित्र गुञ्जनमा महेश दबाडीको लेखन, राजेश श्रेष्ठको छायाङ्कन, कविराज गहतराजको नृत्य निर्देशन र विपीन मल्लको सम्पादन रहेको छ।

बलिउड, हलिउड तथा दक्षिण भारतीय फिल्म रिलिज नभएकाले दुवै नेपाली फिल्मले राम्रो शो पाएका छन्।

पुष २९, २०७९ शुक्रबार ११:१९:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।