हनिट्र्यापमा पारेर ३० लाख असुल, पाँच करोड मागेपछि कारागार चलान

काठमाडौं: दाङ तुलसीपुरका एक व्यक्तिलाई ‘हनिट्र्याप’मा पारेर रु पाँच करोड माग्ने मुख्य योजनाकार कृष्णी गहतरालाई पुर्पक्षका लागि कारागार चलान गरिएको छ। सोमबार भएको थुनछेक बहसमा दाङ देउखुरी जिल्ला अदालतले गढवा–६ घर भई हाल तुलसीपुर बस्दै आएकी ३५ वर्षीया अनुष्का सिंह भनेर चिनिने गहतरालाई कारागार चलान गर्न आदेश दिएको हो।

जिल्ला न्यायाधीश रामप्रसाद बस्यालको एकल इजलासले उनलाई जेल पठाउन आदेश दिएको हो। सिंहका दुई वटा नागरिकता भएको समेत जनाइएको छ।

हनिट्र्यापको आरोपमा प्रहरीले तीन जनालाई पक्राउ गरेको थियो। तीमध्ये तुलसीपुर–१८ ग्वारखोला निवासी ३६ वर्षीया कृष्णीकुमारी बस्नेतलाई पनि कारागार चलान गरिएको छ। उनलाई अदालतले रु एक लाख धरौटी तोकेको थियो। तर धरौटी तिर्न नसकेपछि कारागार चलान गरिएको हो।

आपराधिक लाभ मुद्दा चलाइएका घोराही–१० नारायणपुरका २७ वर्षीय रुद्रबहादुर केसी भने रु एक लाख धरौटीमा छुटेका छन्।

‘ब्ल्याकमेलिङ’ गर्दै मोटो रकम नदिए बलात्कार मुद्दा हाल्ने धम्की दिँदै ती पुरुषसँग उनीहरुले रु पाँच करोड माग गरेका थिए। उनीहरूले पटक–पटक गरी रु ३० लाख लगिसकेको खुलेको छ।

पीडित पुरुषले मुख्य योजनाकार सिंहलाई ‘स्कुटरको लाइसेन्स’ र दुई वटा नागरिकता बनाउन सहयोग गरेको समेत खुलेको छ। त्यस्तै पीडित भनिएका तुलसीपुरका ती पुरुष प्रेम खड्कालाई पनि सरकारी कागज कीर्ते गरेको जनाउँदै मुद्दा चलाइएको छ। पक्राउ परेका खड्कालाई भने साधारण तारेखमा छाडिएको छ।

पुष २६, २०७९ मंगलबार ०७:२४:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।