अभिनेत्री साम्राज्ञीको बदलिएको छविले शुभेच्छुक मक्ख, आलोचक छक्क

काठमाडौँ : अभिनेत्री साम्राज्ञी राज्यलक्ष्मी शाहका पछिल्ला अन्तर्वार्ताहरूले उनका शुभेच्छुकहरू मक्ख छन् भने आलोचकहरू छक्क। उनका पछिल्ला सार्वजनिक अभिव्यक्तिहरू सुन्दा 'हैन यी उनै साम्राज्ञी नै हुन् र!' भन्ने सोच्न बाध्य पार्छिन्।

फिल्म, अन्य कलाकार, वरिष्ठ कलाकार, मिडिया अनि आफ्नो व्यक्तिगत जीवन सबै विषयमा उनी खुलेर बोल्न थालेकी छिन् नै। बोल्नु मात्र ठुलो कुरा भएन। उनका अभिव्यक्ति प्रस्ट र परिपक्व पनि देखिएका छन्।

कोरोनाकालमा लकडाउनको बेला उनले इन्ट्राग्रामलाई आफ्नो भावना पोख्ने थलो बनाउँदा चलचित्र विकास सङ्घका अध्यक्ष भुवन केसीसँग कानुनी लडाइँ नै सुरु भयो। त्यो मुद्दा अहिलेसम्म जिल्ला अदालत काठमाडौँमा विचाराधीन छ।

सार्वजनिक कार्यक्रममा अहिले पनि केसीसँगको उनको विवादबारे प्रश्न उठ्छ नै। उनी सहजै सोध्छिन्' मुद्दा परिरहेको मान्छे विकास बोर्डमा नियुक्त हुन पाउँछ र!' प्रश्न सोध्नेले चित्त बुझाउन भनिदिन्छन्' उनीमाथि मुद्दा परेको भए मिल्दैनथ्यो। तर उनले मुद्दा हालेकाले मिल्छ।'

यो गलत हो। मुद्दा हाले पनि मुद्दा लागे पनि कानुनी रूपमा दोषी ठहर भएको अवस्थामा अपराध र त्यसको सजायको प्रकृतिको आधारमा हो सरकारी नियुक्ति पाउन मिल्ने नमिल्ने।

केसीको मामिलामा यो कानुनी हैन नैतिक प्रश्न थियो। नैतिक रूपमा उनी कति बलियो छन् जगजाहेर विषय नै हो।

उनको पूर्व प्रेमीको तस्बिर देखाएर यो को हो भन्दा लुकाइनन्' सरासर मेरो एक्स' भनिदिइन्।

बिहे कहिले गर्ने भन्ने प्रश्न आउँदा मनले खोजे जस्तो भेटे त बिहे गरिहाल्ने, सन्तान जन्माइहाल्ने अनि बडि मेन्टेन गरेर अभिनयमा फर्कने भनिन्।

साँच्चै भटाभट निर्धक्क मनमा लागेको कुरा निकै शालीनता र भद्रताका साथ व्यक्त गर्न थालेकी छिन् उनले। मिडियासँगको उनको सम्बन्ध त्यति राम्रो पनि हैन अनि त्यति नराम्रो पनि।

युट्युबहरूले जे पायो त्यही हेडलाइन राखे भनेर चैँ उनी एक पटक रिसाउँदै आफ्नै युट्युब च्यानल खोलेकी पनि थिइन्। फिल्म प्रमोसनको समय बाहेक अन्य समयमा मिडियासँग चिटच्याट गर्न त्यति रुचाउने स्वभाव पनि हैन उनको।

तर अब मिडियाबारे उनको धारणा पनि बदलिँदै गएको देखियो। उनी परिपक्व देखिन थालिन् मिडियाको विश्लेषणबारे पनि। त्यसैको प्रमाण त हो फिल्म ‘ह्यारी कि प्यारी’को ट्रेलर रिलिज कार्यक्रममा फिल्म चलेन भने मिडियामा आउने हेडलाइन्स र समाचारलाई कसरी लिनु हुन्छ भन्ने प्रश्नमा उनले भनिन्–‘राम्रो फिल्म बन्यो भने त मिडियाले पनि नराम्रो लेख्दैन नि। यसैले, सबैभन्दा पहिले त फिल्म नै राम्रो बन्नुपर्छ।’

पुष २५, २०७९ सोमबार २१:०९:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।