कर्णाली राजमार्गबाट तिला नदीमा अटो खस्दा दुई जनाकाे मृत्यु

जुम्लाः जुम्लाको तिला गाउँपालिका-३ स्थित त्रिवेणीमा अटो दुर्घटना हुँदा दुई जनाको मृत्यु भएको छ। तिला गाउँपालिकाकाे रारालिहीबाट जुम्ला सदरमुकाम खलङ्गा बजार आउँदै गरेको क. १ स ११ नम्बरको अटो दिउँसो २ बजेतिर तिला नदीमा खसेकाे थियाे।

अटो तिला–३ त्रिवेणीमा कर्णाली राजमार्गबाट १५ मिटर तल नदीमा खसेको जिल्ला प्रहरी कार्यालय जुम्लाले जनाएको छ।

दुर्घटनामा जिल्लाको तातोपानी गाउँपालिका–१ बाइराँकाका २९ वर्षीय पुरन सार्की र तिला–३ का २१ वर्षीय आकाश थापाको मृत्यु भएको जिल्ला प्रहरी कार्यालय जुम्लाका प्रहरी नायब उपरीक्षक नरेन्द्र चन्दले जानकारी दिए।

सार्कीको घटनास्थलमै मृत्यु भएको हाे भने थापाको उपचारका क्रममा कर्णाली स्वास्थ्य विज्ञान प्रतिष्ठानमा मृत्यु भएको हाे। मृतक दुवैको शव परीक्षणका लागि कर्णाली स्वास्थ्य विज्ञान प्रतिष्ठानमा राखिएको प्रहरीले जनाएको छ।

पुष २१, २०७९ बिहीबार १८:५२:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।