चर्च ब्वाइजलाई हराउँदै अमेरिकी टाेली बीवाईएससी आहारारा गोल्डकपकाे फाइनलमा

पोखराः पोखरामा जारी २२ औं आहा रारा गोल्डकपमा अमेरिकी क्लब बीवाईएससी फाइनलमा प्रवेश गरेको छ। बिहीबार पोखरा रंगशालामा भएको दोस्रो सेमिफाइनल खेलमा चर्च ब्वाइजलाई १–० ले हराउँदै बीवाईएससीले फाइनलमा स्थान पक्का गरेकाे हाे।

खेलको पहिलो हाफको अतिरिक्त समयमा बीवाईएससी निर्णायक गोल गर्न सफल भएको थियो। ३ मिनेट थपिएको इन्जुरी समयमा रोजिन प्रजापतिले गोल गर्दे बीवाईएससीलाई अग्रता दिलाएका थिए। उनले प्रविन बस्नेतले दिएको पासमा हेडर गाेल गरेका थिए। 

खेलको ८३ औं मिनेटमा चर्च ब्वाइजका आशीष चौधरी रातो कार्ड खाँदै मैदानबाट बाहिरिए पछि अन्तिम समयमा चर्च ब्वाइज १० खेलाडीमा सीमित हुन पुगेको थियो। चौधरीले बल खोस्ने क्रममा बीवाईएससीका डाइलो इराकागलाई लडाएका कारण रेफ्रीले रातो कार्ड दिएका थिए।

उपाधिका लागि अब अमेरिकी क्लब बीवाईएससी र संकटा क्लबबीच पुस २३ गते फाइनल खेल हुनेछ। प्रतियोगितकाे विजेताले उपाधिसँगै १२ लाख र उपविजेताले ६ लाख नगद पुरस्कार पाउनेछन्।

पुष २१, २०७९ बिहीबार १८:००:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।