चन्द्रागिरिमा दीपाको सिउँदो भरियो, भिडियो भाइरल भएपछि दीपक भन्छन्- ‘कमेन्ट पढ्न हुन्न’

काठमाडौं : चन्द्रागिरिस्थित भालेश्वर मन्दिरका मुल पुजारी विदुर न्यौपाने सामाजिक सञ्जाल टिकटकमा सक्रिय छन्। चन्द्रागिरिको मौसमको अवस्था एवं त्यहाँ आएका विशिष्ठ र चर्चित पाहुना आउँदा उनले टिकटकमार्फत जानकारी दिने गर्छन्।

जाडो महिना लागेसँगै चन्द्रागिरिमा हिउँ परेको छ वा छैन भन्नेबारे पनि उनले जानकारी दिइरहेका हुन्छन्। यस्तैमा मंगलबार उनले टिकटकमा एक भिडियो राखे, जसमा थिए कलाकारद्वय दीपकराज गिरी र दीपाश्री निरौला।

दीपक खैरो छालाको जुत्ता, जिन्स पाइन्ट, कुर्था र त्यसमाति ज्याकेटमा थिए भने दीपा साडीमा सजिएकी थिइन्। भिडियोमा दीपकले पश्चिमी शैलीमा भनेका छन्, ‘भालेश्वर दर्शन आया हो, गुरुबासँग भेट भया हो, अब भालेश्वरले हामी सबैलाई रक्षा गरुन्। जय होस्।’

@bidurneupane65 भालेश्वोरको दर्शन गर्न आया हो, गुरुबा सग भेट भया हो, भालेश्वोरले हामी सबलाई रक्षा गरुन, जय हो🙏🙏 @deepak_rajgiree @deepashreeniraula #जय_भालेश्वोर_महादेव🙏🙏 #हुन्छ_पूरा_चिताएको_कुरा🙏 #भालेश्वोर_महादेव_मन्दिर_चन्द्रागिरि🙏 #bidurguru #bidurneupane #chandragiricablecar #chandragiri_hills ♬ original sound - Bidur Neupane (मूल पुजारी)

दीपकले यति भन्दै गर्दा सबैको ध्यान भने दीपाले तान्छिन्, विवाह नभएकी उनको सिउँदोमा सिन्दुर देखेपछि दर्शकले विभिन्न अड्कबाजी गरेका छन्। उनीहरूले दीपाको विवाह भएको त होइन भन्ने प्रश्नसमेत तेर्स्याएकाे देखिन्छ।

टिकटक प्रयोगकर्ता नुर अर्याल लेख्छन्, ‘दुनियाँलाई झुक्याए पनि भगवानले थाहा पाउनेछन्।’ अर्का प्रयोगकर्ता सन्तोष गिरीले अनविज्ञता प्रकट गर्दै खास कुरा केहो भन्दै प्रश्न गरेका छन्।

मनसुन नामकी प्रयोगकर्ता दीपककै शैलीमा लेख्छिन्, ‘दर्शन गर्न गया हो कि बिहे गर्न गया हो? कुरो बुझ्न गाह्रो भया हो। दिपाको सिउँदो मा सिंदुर हामी जन्ताले देख्या हो।’

भिडियोलाई अहिलेसम्म १२ लाखभन्दा बढिले हेरिसकेका छन् भने ६ सयजति कमेन्ट आएको छ। जसमा खास कुरा के हो भनेर सोधिएको छ। आखिरमा खास कुराचाहिँ के हो त भनेर हामीले कलाकार दीपकराज गिरीलाई नै सोधेका छौं।

उकेरासँगको कुराकानीमा दीपकले दीपाको विवाह भएको कुरा स्वीकारे तर रियलमा चाहिँ होइन रहेछ। चलचित्र ‘छक्का पञ्जा ४’को छायांकनको क्रमको दृश्य रहेछ यो। त्यहि उनले दीपकले भिडियोमा पनि पश्चिमेली शैलीमा बोलेका रहेछन्।

‘हामी छक्का पञ्जा ४ को सुटिङका लागि चन्द्रागिरि गएका थियौं,’ उनले उकेरासँग भने, ‘गुरुबाको आग्रहमा टिकटक बनाएका हौं।’

हामीले फेरि प्रश्न गरिहाल्यौं, ‘कमेन्ट पढ्नुभयो त?’ दीपकले जवाफ दिइहाले, ‘त्यस्तो काम गर्नुहुन्न, आफू सहि हुनुपर्छ कमेन्ट आइरहन्छन्।’

आमा सरस्वती मुभिज र आईएमईको प्रस्तुतमा दीपक–दीपाले बनाएको फिल्मलाई हेमराज बीसीले निर्देशन गरिरहेका छन्। चलचित्रकाे छायांकनसँगै पाेस्ट प्राेडक्सनकाे काम पनि सँगै हुँदैछ।

केदारप्रसाद घिमिरे र निर्मल शर्मा कार्यकारी निर्माता रहेको फिल्म आगामी फागुन १९ गते देशभर प्रदर्शन हुँदैछ।

पुष २०, २०७९ बुधबार ११:१४:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।