२८ अर्ब ३६ करोडको सम्झौतामा साउदी पुगे क्रिस्टियानो रोनाल्डो
काठमाडौं : विश्वका चर्चित फुटबल खेलाडी क्रिस्टियानो रोनाल्डो मंगलबार बिहान साउदी अरेबियाको राजधानी रियाद पुगेका छन्।
रोनाल्डोले साउदी अरेबियाको फुटबल क्लब अल–नासरसँग १७७ मिलियन पाउण्ड (२८ अर्ब ३६ करोड रूपैयाँ)को सम्झौता गरेका छन्, जसअन्तर्गत रोनाल्डो सन् २०२५ सम्म अल–नासर क्लबसँग रहनेछन्।
रोनाल्डोको म्यान्चेस्टर युनाइटेडसँगको सम्झौता सकिएपछि उनको भविष्यका बारेमा धेरै अड्कलबाजी गरिएको थियो।
रोनाल्डोको करियरको सूर्यास्त हो भनेर सामाजिक सञ्जालमा समेत लेखिएको थियो। तर, साउदी अरेबियाको फुटबल क्लबसँगको यस्तो महंगो सम्झौतापछि केही समयका लागि यी अड्कलहरूको अन्त्य भएको छ।
रोनाल्डोसँग आवद्ध भएपछि नौ साउदी प्रो लिग जितेको क्लबले आफ्नो टोलीलाई बलियो बनाउने अपेक्षा गरिएको छ।
पुष १९, २०७९ मंगलबार ११:५७:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
