आर्मीलाई हराउँदै संकटा आहा रारा गोल्डकपकाे सेमीफाइनलमा

पोखराः विभागीय टोली त्रिभुवन आर्मीलाई हराउँदै संकटा क्लब पोखरामा जारी २२ औं ‘आहारारा’ गोल्डकपको सेमिफाइनलमा प्रवेश गरेको छ। पोखरा रंगशालामा सोमबार भएको क्वाटरफाइनल खेलमा संकटा क्लबसँग त्रिभुवन आर्मी ३–१ गोल अन्तरले पराजित भयाे।

खेलमा अग्रता भने आर्मी क्लबले लिएको थियो। आर्मीका तर्फबाट खेलको १५ औं मिनेटमा नवयुग श्रेष्ठले गोल गर्दै अग्रता दिलाएका थिए। तर, सुरुवाती अग्रतालाई कायम राख्न नसक्दा आर्मी क्लब पराजय भोग्न बाध्य भयो। 

खेलको १४ औं मिनेटमा दिनेश हेम्जनलाई संकटाका निशान खड्काले डीबक्स क्षेत्रमा लडाएपछि आर्मीले पेनाल्टी पाएको थियो। उक्त पेनाल्टीको सदुपयोग गर्दै १५ औं मिनेटमा नवयुग श्रेष्ठ गोल गर्न सफल भए।

यसपछि, संकटाले खेलको ३५ औं मिनेटमा बराबरी गाेल फर्कायाे। संकटाका लागि मेसुके पहिलो गोल गर्न सफल भएका थिए। खेलको ७३ औं मिनेटमा संकटाका सुरज जिउ ठकुरीले गोल गर्दै टिमलाई अग्रता दिलाए। 

खेलमा निर्धारित समय सकिएपछि थपिएको अतिरिक्त ६ मिनेटको सुरुवातमा संकटाको मेसुकेले दिएको पासलाई सदुपयोग गर्दै स्टेफन बिनोङले अर्काे गाेल गरेका थिए। अब संकटाले सेमिफाइनलका एपीएफ क्लबसँग खेल्नेछ।
 

पुष १८, २०७९ सोमबार १९:१३:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।