‘पठान’का निर्मातामाथि गीत चोरीको आरोप, पाकिस्तानी गीतसँग मिल्यो ‘बेशर्म रंग’
एजेन्सी : बलिउडका चर्चित स्टार शाहरुख खान आजकल आफ्नो फिल्म पठानलाई लिएर निकै चर्चामा छन्।
सबैभन्दा पहिले यो फिल्मको टिजर रिलिज भएको थियो, जसलाई मानिसहरुले निकै रुचाएका थिए। त्यसपछि यो फिल्मको पहिलो गीत सार्वजनिक भयो। गीत आएसँगै विवाद पनि सँगसँगै सुरू भयो।
फिल्मको ‘बेशरम रंग’ गीत रिलिज भएदेखि नै फिल्म विवादमा परेको छ। गीतको सन्दर्भमा मानिसहरूलाई नायिका दीपिका पादुकोणले लगाएको लुगा त मन परेन नै गीतमाथि नै राजनीति भयो।
तर यतिले मात्रै छाडेको छैन निर्मातालाई। अब फिल्म निर्माता र संगीतकारमाथि नयाँ आरोप लागेको छ। फिल्मको ‘बेशर्म रंग’ बोलको गीत चोरीको आरोप लागेको छ। पाकिस्तानी गायक सज्जाद अलीले निर्मातामाथि गीत चोरेको आरोप लगाएका हुन्।
मिडिया रिपोर्टकाअनुसार सज्जाद अलीले ‘बेशर्म रंग’ गीत ‘अब के हम बिछडे’ गीतसँग मिल्दोजुल्दो रहेको बताए। स्मरण रहोस्, ‘अब के हम बिछडे’ सज्जाद अलीको पुरानो गीत हो। उनले गीतको भिडियो इन्स्टाग्राममा समेत राखेका छन्।
यी पाकिस्तानी गायक चर्चामा आएपछि ‘बेशर्म रंग’ गीत फेरि एकपटक चर्चाको विषय बनेको छ। मनोरञ्जन जगतका ठूला शाहरुख खानको यो फिल्म यसै वर्ष २५ जनवरीमा रिलिज हुँदैछ।
फिल्ममा सलमान खानको क्यामियो भूमिकासमेत छ। लामो समयपछि शाहरुख र सलमान सँगै देखिनेछन्।
पुष १८, २०७९ सोमबार १३:२७:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
