अञ्जन र अनन्तको गोलमा चर्च ब्वाइज आहा रारा गोल्डकपको क्वार्टरफाइनल प्रवेश

पोखरा : चर्च ब्वाइज युनाइटेड पोखरामा जारी २२औं संस्करणको आहा रारा गोल्डकपको क्वार्टरफाइनल प्रवेश गरेको छ।

पोखरा रंगशालामा भएको खेलमा चर्च ब्वाइजले नेपाल पुलिस क्लबलाई २–१ ले हरायो। उसको जितमा अञ्जन विष्ट र अनन्त तामाङले एक–एक गोल गरे।

खेलको पहिलो हाफमा विभागीय टिम नेपाल पुलिस क्लबले अग्रता लिए पनि त्यसलाई कायम नराख्दा प्रतियोगिताबाट बाहिरिन बाध्य भयो।

खेलको २५औं मिनेटमा पुलिसका रविशंकर पासवानले गोल गर्दै अग्रता दिलाएका थिए। उनले निरकुमार राईको पासलाई गोलमा परिणत गरे। तर खेलको ७७औं मिनेटमा अञ्जन विष्टले गोल गर्दै खेल बराबरीमा ल्याए।

निर्धारित समयमा बराबरी गोल भएपछि खेल अतिरिक्त समयमा पुगेको थियो। खेलको ९८औं मिनेटमा चर्च ब्वाइजका अनन्त तामाङले गरेपछि पुलिस २–१ ले पछि पर्यो। यो खेलको निर्णायक गोल बन्यो।

शनिबार प्रतियोगितामा सशस्त्र प्रहरीको एपीएफ क्लब र धरान फुटबल क्बलबीच हुनेछ।

पुष १५, २०७९ शुक्रबार २०:४८:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।