आठ करोड ७८ लाखमा बनाएको फाप्लु विमानस्थलको प्रवेशद्वार उपयोगविहीन
काठमाडौं: सोलुखुम्बुको फाप्लु विमानस्थलमा बनाइएको मुख्य प्रवेशद्वार उपयोगविहीन भएको छ। नेपाल नागरिक उड्डयन प्राधिकरणको रु आठ करोड ७८ लाखमा निर्माण गरिएको विमानस्थल प्रवेश गर्ने मुख्य द्वार तथा मार्ग प्रयोगमा आउन सकेको छैन।
उक्त प्रवेशद्वार विसं २०७७ मा निर्माण गरिएको हो।
प्रवेशमार्ग प्रयोगमा नआउँदा यात्रु जोखिम मोलेर साँघुरो मार्ग प्रयोग गर्न बाध्य छन्। विमानस्थल भित्रिने र बाहिरिने गरी बनाइएको फरक–फरक मार्ग सञ्चालन नहुँदा टावरका कर्मचारी तथा सुरक्षाकर्मी कार्यालय प्रवेश गर्ने साँघुरो मार्ग प्रयोग गर्न यात्रु बाध्य बनेका हुन्।
वैकल्पिक मार्ग अत्यन्त साँघुरो हुँदा अत्यावश्यक बिरामी धावनमार्गसम्म लैजानुपर्ने भएमा स्टेचर प्रवेश गराउनसमेत कठिन रहेको जनाइएको छ। साथै विमानस्थलमा ठूला सामग्रीहरू प्रवेश गराउनुपर्ने वा निकाल्नुपर्ने भएमा समेत कठिन हुने गरेको छ।
नेपाल नागरिक उड्डययन प्राधिकरण फाप्लुका प्रमुख भानुभक्त आचार्यले उक्त गेटको प्रवेशद्वार भन्दाभित्र भागको वालको करिब पाँच मिटर भागमा ग्याभिङ जाली नभएकाले सञ्चालन नगरिएको बताए। धावनमार्ग माथिल्लो भागको स्टेपमा समेत प्राविधिक समस्या रहेकाले मर्मतपश्चात् मात्रै सञ्चालन गर्न सकिने उनको भनाइ छ।
यसका लागि आफूले प्राधिकरणको केन्द्रीय कार्यालयमा पत्राचार गरिसकेको उनले बताए।
प्राधिकरणका आयोजना प्रमुख इञ्जिनियर रत्नबहादुर श्रेष्ठले भने उक्त गेट सञ्चालन गर्नमा समस्या नरहेको दावी गरे। नयाँ गेट वर्षौँदेखि उपयोगविहीन हुँदा यात्रुलाई समस्या हुनुका साथै सुरक्षामा समेत चुनौती आउन सक्ने जनाउँदै उनले सञ्चालनका लागि पहल गर्ने प्रतिक्रिया दिए।
पुष १२, २०७९ मंगलबार १०:३६:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
