बिकिनीको रङ्गको विवादबीच शाहरुख र दीपिकाको फिल्म 'पठान'को ओटीटी राइट्स सय करोड भारुमा बिक्यो

एजेन्सी: शाहरुख खान र दीपिका पादुकोण अभिनित फिल्म 'पठान'को ओटीटी राइट्स बिकेको छ। अमेजन प्राइमले एक सय करोड भारुमा फिल्मको ओटीटी राइट्स किनेको हो।

पठान यही आउँदो जनवरी २५ मा रिलिज हुँदैछ। फिल्म मार्च या अप्रिलमा अमेजन प्राइममा स्ट्रिम हुनसक्ने बताइएको छ।

करिब चार वर्षपछि शाहरुखले फिल्म पठानमार्फत् ठूलो पर्दामा पुनः पदार्पण गर्दैछन्। यसअघि उनी सन् २०१८ मा फिल्म 'जिरो' मा देखिएका थिए।

फिल्मको बजेट करिब २५० करोड भारु छ। यस्तोमा रिलिजअघि नै राम्रो आम्दानी गरेको छ फिल्मले।

तर फिल्मको गीत 'बेशरम रङ्ग' निकै विवादमा आएको थियो। गीतको भिडियोमा दीपिकाले लगाएको बिकिनीको रङ्गलाई लिएर विवाद सुरु भएको थियो। विभिन्न हिन्दू संगठनले दीपिकाको लुगालाई लिएर आपत्ति जनाएका थिए।

हिन्दू धर्मको प्रतीक रङ्ग लगाएर त्यसलाई बेशरम रङ्ग भनिएकोमा उनीहरूको आपत्ति थियो। त्यसमाथि बिकिनी जस्तो पहिरनमा उक्त रङ्ग हुनुलाई उनीहरूले विरोध गरेका हुन्।

विरोध गर्नेहरूले गीत परिवर्तन नगरेसम्म फिल्मलाई रिलिज हुन नदिने बताएका छन्।

पुष ११, २०७९ सोमबार ११:१६:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।