एक हप्तामा खोटाङका आठ घरमा आगलागी, पाँच करोडभन्दा बढिको क्षति

खोटाङ : दिक्तेल रूपाकोट मझुवागढी नगरपालिका–३ बाम्राङस्थित झिसेपुमा आज आगलागी हुँदा तीन घर जलेर नष्ट भएका छन्।

स्थानीय मैया श्रेष्ठको घरमा जडान गरिएको विद्युत् सर्ट भएर सुरु भएको आगलागीबाट मैया श्रेष्ठ, कृष्णकुमार श्रेष्ठ र कर्णकुमार श्रेष्ठको घर जलेर नष्ट भएको हो।

दिउँसोको समयमा भएको आगलागी स्थानीय बासिन्दा, प्रहरी र नेपाली सेनाको संयुक्त टोली नियन्त्रणमा लिएका थिए।

आगलागीमा नगद, सुनचाँदी, लत्ताकपडा, भाँडाकुँडा, अन्नपातलगायत सम्पूर्ण बन्दोबस्तीका सामग्री जलेर नष्ट हुँदा ८४ लाख ५६ रूपैयाँ बराबरको क्षति भएको जिल्ला प्रहरी कार्यालय खोटाङका प्रमुख प्रहरी नायब उपरीक्षक मञ्जिल मुकारूङले जानकारी दिए।

उनका अनुसार मैयाको तीनतले घर, नगद एक लाख रूपैयाँ, चाँदी २० तोला, मोबाइल, टिभीलगायत घरमा भएका सम्पूर्ण सामग्री जलेर नष्ट हुँदा २७ लाख ४५ हजार रूपैयाँ बराबरको क्षति भएको छ। 

यस्तै कृष्णकुमारको तीनतले घर, नगद एक लाख ५० हजार रूपैयाँ, दुई तोला सुन, एक थान मोबाइललगायत सम्पूर्ण सामग्री जलेर नष्ट हुँदा २८ लाख ८३ हजार रूपैयाँ बराबरको क्षति भएको छ।

कर्णकुमारको तीनतले घर तथा घरमा भएका सम्पूर्ण सामग्री जलेर नष्ट हुँदा २८ लाख २८ हजार रूपैयाँ बराबरको क्षति भएको प्रहरीको भनाइ छ।

आगलागीमा घर तथा घरमा भएका सम्पूर्ण सामग्री गुमाएका पीडित परिवार आफन्तकामा आश्रय लिएर बसिरहेको वडाध्यक्ष महेन्द्र राईले जानकारी दिए।

यसअघि यही पुस ४ मा केपिलासगढी गाउँपालिका–४ बाक्सिला बजारमा आगलागी हुँदा पाँच घर जलेर नष्ट भएका थिए। स्थानीय दीपक गुरुङको घरबाट सुरु भएको आगोले पाँचवटा घर तथा दर्जन बढी पसल जलेर नष्ट हुँदा चार करोड ९९ लाख ३३ हजार रूपैयाँ बराबरको क्षति भएको थियो।

पुष ९, २०७९ शनिबार २२:०५:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।