'द भ्वाइस अफ नेपाल'का विजेता करण राईले पुरस्कारबापत के-के पाए ?

काठमाडौं: 'द भ्वाइस अफ नेपाल सिजन ४' समापन भएको छ। हिजो भएको ग्राण्ड फिनालेमा टिम राजुबाट करण राई यस संस्करणको विजेता चुनिए।

फिनालेमा चार टिमका चार फाइनलिस्ट थिए। टिम प्रमोदबाट योगेश मगर, टिम राजुबाट करण राई, टिम राजेशबाट सविना योङहाङ लिम्बू र टिम प्रविशाबाट शाहिल लिम्बू चार फाइनलिस्ट थिए।

जसमध्ये शाहिल लिम्बू चौथो भए। सेकेण्ड रनरअप भए- योगेश मगर। सविना फर्स्ट रनरअप भइन्। विजेता भए- करण राई।

करणले सबैभन्दा बढी भोट ल्याएर भ्वाइसको उपाधि जिते। टिम राजु पनि भ्वाइसमा पहिलो पटक विजेता बन्यो।

करणले विजेता भएपछि उपाधिको ट्रफीसँगै २५ लाख नगद पुरस्कार पाए। अमेरिकाबाट भ्वाइसकै अडिशनको लागि भनेर नेपाल आएका करणले पुरस्कारबापत पल्सर एनएस २५० पनि प्राप्त गरे। यस्तै साढे दुई तोला सुनकाे सिक्री र सामसुङ ग्यालेक्सी जेड फोल्ड मोबाइल फोन पनि  प्राप्त गरे।

'करणको विजय संगीतको विजय हो। मेरो मात्र होइन भ्वाइस अफ नेपालको विजय हो। म धेरै खुशी छु', विजयी भएपछि कोच राजु लामाले भने। उनले आफ्नो सल्लाहकार बबी लामालाई पनि धन्यवाद व्यक्त गरे।

फिनालेमा टप १२ का १२ जना नै कन्टेस्टेन्टले प्रस्तुति दिएका थिए। तर, स्वास्थका कारण भूपेन्द्र राना मगर भने उपस्थित भएनन्। उनी ग्राण्ड अन्तर्राष्ट्रिय अस्पतालमा उपचार गरिरहेको भिडियो देखाइएको थियो।

पुष ९, २०७९ शनिबार १२:१२:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।