तोलामा १२ सयले घट्यो सुनको मूल्य, तर अझै एक लाखमाथि

काठमाडौं: नेपाली बजारमा आज सुनको मूल्य घटेको छ। आज सुन एकैदिन एक हजार दुई सय रुपैयाँले घटेको हो।

जसअनुसार आज छापावाल सुन प्रतितोला एक लाख तीन सय रुपैयाँमा कारोबार भइरहेको छ। हिजो छापावाल सुन तोलामा एक लाख एक हजार पाँच सयमा कारोबार भएको थियो।

नेपाल सुनचाँदी व्यवसायी महासङ्घका अनुसार आज तेजाबी सुनको मूल्य प्रतितोला रु ९९ हजार आठ सय तोकिएको छ।

यस्तै आज चाँदीको मूल्य पनि रु १५ ले घटेको छ। चाँदी आज प्रतितोला रु एक हजार तीन सय ९० रुपैयाँमा कारोबार भइरहेको महासङ्घले जनाएको छ।

महासङ्घले अन्तर्राष्ट्रिय बजारमा हुने सुन तथा चाँदीको कारोबार मूल्यका आधारमा यहाँ दैनिक सुन तथा चाँदीका मूल्य तोक्दै आएको छ। हाल अन्तर्राष्ट्रिय बजारमा सुन प्रतिऔँस एक हजार सात सय ९४ दशमलव आठ अमेरिकन डलर आसपासमा कारोबार भइरहेको जनाइएको छ।

पुष ८, २०७९ शुक्रबार ११:१६:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।